АПЛ. «Челси» ўз уйида ютқазиб қўйди, «Лестер»да эса дуранг (видео)

Футбол бўйича Англия чемпионатининг 17-тури доирасида 14 декабрь, шанба куни навбатдаги 4 та баҳс бўлиб ўтди.

Фрэнк Лэмпард қўл остидаги Лондоннинг «Челси» клуби «Стемфорд Бриж»да «Борнмут»ни қабул қилди.

Учрашувдаги ягона голга меҳмон жамоа ярим ҳимоячиси Дэн Гослинг (84) муаллифлик қилди.

Шу тариқа «аристократлар» ўз уйида «Борнмут»га кичик 0:1 ҳисобида мағлуб бўлди ва очко йўқотди.

Маълумот учун, «Челси» 29 очко жамғарган ҳолда мусобақа жадвалида 4-ўринда бормоқда. «Борнмут» эса 19 очко билан 14-ўриндан жой олди.

Шу куни Брендан Рожерс бошқарувидаги «Лестер» ўз майдонида «Норвич» билан беллашди.

Ўйиннинг 26-дақиқасида «канарейкалар» ҳужумчиси Теему Пукки ҳисобни очган бўлса, 38-дақиқага келиб меҳмон жамоа дарвозабони Тим Крул автогол муаллифига айланди.

Натижада баҳс 1:1 ҳисобида якунланди ва томонлар бир очкодан бўлишиб олди.

Қайд этиш жоиз, «Лестер» айни дамда 39 очко тўплаб мусобақа жадвалида 2-поғонани эгаллаб турибди. «Норвич» эса 12 очко йиғиб 19-ўринни банд қилиб турибди.