«Раддия ёзинг, барчаси ёлғон денг. Биз сизни депутат қиламиз». Сурхондарёлик масъуллар сайлов тақдирини олдиндан белгилашга уринаётгани айтилмоқда

«Дарё» интернет нашрида «‘Аризага яхшиликча имзо қўйинг, бу ҳокимнинг топшириғи’. Парламент сайловларига қадар партиявийлиги ўзгариб қолган Сурхондарёлик номзод сохта аризага имзо чекишга мажбурланмоқда» сарлавҳали мақола эълон қилинганди. Мақолада Сурхондарё вилоятининг Қизириқ туманидаги 30-мактаб директорининг сайловга қадар партиявийлиги ўзгариб қолиши ва бошқа партиядан номзод сифатида кўрсатилаётгани тилга олинади. Шунингдек, фуқаро Чори Мирзаев депутатликка номзод қўйиш учун ХДПга 170 минг сўм пул тўлагани ёзилганди.

Мазкур мақолага Халқаро матбуот маркази Сурхондарё вилоят бўлими муносабат билдирди. Дастлаб Халқаро матбуот маркази муносабатини эътиборингизга ҳавола қиламиз.

Мазкур хабарнинг ҳақиқатга яқинлигини билиш учун сиёсий партиялар ва хабарда тилга олинган мутасаддилар билан боғланиб, масалага ойдинлик киритишга ҳаракат қилдик. Зеро мамлакатимизда муҳим сиёсий жараён яқинлашаётган бир пайтда бу каби маълумотлар сайловчиларни чалғитиб қўйиши ҳам ҳеч гап эмас.

Маълум бўлишича, Қизириқ туманидаги 30-мактаб директори Дилбар Саидова тадбиркорлар ва ишбилармонлар ҳаракати — Ўзбекистон Либерал-демократик партияси Қизириқ туман Кенгашига номзодини депутатликка кўрсатиш бўйича ариза билан мурожаат этмаган. Шунингдек, партиянинг туман Кенгаши йиғилишида Дилбар Саидованинг номзоди депутатликка кўрсатилмаган.

Ваҳоланки, сиёсий партиялар депутатликка номзодларни партия сафидаги энг фаол номзодлар орасидан саралаб олади. Делегатларнинг кўпчилик овози билан тасдиқланади.

Ўзбекистон Халқ демократик партияси Қизириқ туман Кенгаши  Пленумининг тегишли қарорига асосан Саидова Дилбар Пўлатовна 6-«Янги йўл» сайлов округидан халқ депутатлари Қизириқ туман Кенгаши депутатлигига номзод этиб кўрсатилган.

Хабарда шу туманда яшайдиган фуқаро Чори Мирзаевнинг «маҳаллий Кенгаш депутатлигига номзодимни қўйдириш учун 170  минг сўм тўладим, партия  нашрига обуна бўлдим, алам қилгани номзодлар рўйхатидан олиб ташлашгани» деган сўзлари келтирилгани ҳам ажабланарлидир. Зотан партия нашрига обуна бўлиш депутатликка номзоди кўрсатилди, дегани эмас. Нашрга ўз хоҳиши билан обуна бўлган фуқарога эса пленумда номзоди қўллаб-қувватланмай қолгач, обунани дастак қилиши ҳам ярашмайди.

Бироқ ХДП Қизириқ тумани Кенгаши раиси Ю. Умбаров фуқаро Чори Мирзаев ҳеч қандай тўлов қилмаганлиги ҳамда унга номзодини қўйишни ҳам билдирмаганлигини маълум қилди. Шунингдек, сиёсий партияларнинг конференция ва пленумида депутатликка номзоди қўллаб-қувватланмаган фуқароларнинг мурожаатлари асосида турли фикрларни илгари суриш ҳам «Daryo.uz»дек нуфузли сайтга ярашмайди.

Халқаро матбуот маркази Сурхондарё вилоят бўлими

Халқаро матбуот марказининг вилоят бўлими Дилбар Саидованинг партиявийлиги ўзгарганию, номзодликка ўтиш учун фуқаро Чори Мирзаевнинг 170 минг сўм тўлаганини тан олмаяпти.

Депутатликка номзод Дилбар Саидованинг ишончли вакиллари Адҳам Эргашев ҳамда Дилафрўз Саидовалар эса номзоднинг дастлаб ЎзЛиДеПдан кўрсатилганлигини, аммо партиявийлиги кейин ўзгариб қолганини таъкидламоқда.

— Дилбар Саидовага ишончли вакилман, — дейди Адҳам Эргашев. – Дилбар опанинг номзоди дастлаб ЎзЛиДеПдан кўрсатилганди, аммо 3 кун олдин билдим, энди Халқ демократик партиясидан кўрсатилаётган экан.

Дилбар Саидованинг яна бир вакили Дилафрўз Саидова ҳам номзод ЎзЛиДеПдан кўрсатилганини, сўнгра ўзгариш бўлганини айтмоқда.

— Баҳром Холбоев исмли киши менга ЎзЛиДеПдан кўрсатилаётган номзоднинг ишончли вакили эканлигимни айтиб, гувоҳнома берганди, — дейди Дилафрўз Саидова. – Энди билсак, номзодимизнинг партиявийлиги ўзгарган. Нима учун ўзгарганини билолмай сарсонмиз.

«Дарё» мухбири билан суҳбатлашган Дилбар Саидованинг айтишича, мақола эълон қилингач туман ХТБ мудири Хўшмурод Муҳаммадиев ва мутасадди раҳбарлар мактаб директорининг ОАВга очиқ-ошкора маълумот берганини қоралаган. Ва муаммони фақатгина ўзлари ҳал қилишлари мумкинлигини айтган.

— Менга «Daryo.uz» сайтига раддия ёзинг, барчаси ёлғон денг номзодингизни ХДПдан кўрсатаверинг, биз сизни депутат қиламиз», дейишмоқда, — дейди Дилбар Саидова. – Мен эса ЎзЛиДеПга аъзолигимни ва номзодимни қайтариб беришларини сўрадим.

Дилбар Саидованинг маълумот беришича, ХТБ мудири мактаб директорини даставвал вилоят халқ таълими бошқармаси бошлиғи билан гаплаштирган. Сўнгра туман ҳокими қабулига олиб борган. Ҳар иккала масъул ҳам номзоднинг ОАВга мурожаатини қоралаб, ХДП номзоди сифатида қолишини сўраган.

Дилбар Саидованинг айтишича, масъуллар вазиятни босди-босди қилиб, ўз ҳолича қолдириш ниятида. Депутатликка номзод ва унинг ишончли вакиллари шу ҳолатдан чўчияпти.

Қизириқ туманида яшовчи Абдуғаффор Шодмоновнинг Дилбар Саидовага маълумот беришича, Тўра Шойқулов исм-шарифли номзод бир вақтнинг ўзида икки ҳудуддан ҳар хил партиялардан депутатликка даъвогар бўлган.

— Партияларнинг пала-партиш иши ва тала-тўп сабаб Тўра Шойқулов вилоятга бизнинг партиядан (Дилбар Саидованинг айтишича Абдуғаффор Шодмонов илгари «Адолат» партиясининг масъули бўлган) номзод қилиб қўйилган бўлса, туманга ХДП номзоди қилиб кўрсатилган, — дейди Абдуғаффор Шодмонов. — Газетага ҳам худди шундай босилган. Анча шов-шув бўлганди. Ҳатто Сариосиё туманидан ўлган кишиларни, ҳатто Россияда «лапатка» кўтариб юрганларни ҳам кўрсатиш ҳолати бўлган.

Дилбар Саидованинг айтишича ўзи билан боғлиқ масалага Қизириқ туман сайлов комиссияси раҳбари Эркин Арабов айбдор.

— Туман сайлов комиссияси раҳбари Эркин Арабовнинг ўзбошимчалиги сабаб шу вазият юзага келди, — дейди Дилбар Саидова. – Энди ҳамманинг боши қотган. Менга бошқа партия аъзолиги ва депутатлиги керак эмас. Майли, сайловда қатнашиш фикридан ҳам қайтаман, фақат менинг ЎзЛиДеПга аъзолигимни қайтаришсин.