Оммавий ахборот воситаларининг ижтимоий тармоқлардаги саҳифалари, оммабоп Telegram каналлари, блогерларнинг саҳифаларида Ўзбекистоннинг айрим ҳудудларида 2018 йил бошида тугатилган назорат постлари қайта тикланаётгани ҳақида хабарлар пайдо бўлди.
«Sof.uz» нашрининг хабар беришича, «Фарғона—Водил», «Фарғона—Аввал» йўлларида 2018 йил бошида тугатилган назорат постлари қайта тикланган. Блогер Шерали Солиевнинг муштарийлари Қувасой шаҳрига киришдаги «Пакана» пости, Қўчқорчига киришдаги пост, «Қувасой—Арсиф» йўналишидаги «Беҳизор» постлари қайта тикланганини маълум қилган.
Блогернинг муштарийлари, шунингдек, Тошкент вилояти Қибрай туманидаги Аграр университет билан Салор қўрғони оралиғидаги пост қайта тиклангани ҳақида ҳам ёзган. Бундан ташқари, Бухоро вилоятининг Ғиждувон туманидаги «Сармижон» ва «Эшонкўприк» постлари фаолияти 2018 йил бошида тўхтатилгач, кўп ўтмай яна қайта тиклангани таъкидланган.
«Дарё»нинг ҳукуматдаги манбасининг маълум қилишича, Фарғона вилоятидаги фаолияти қайта тикланган постлар 22 декабрга қадар фаолият юритади, парламент сайлови ўтгач яна олиб ташланади. Манбанинг қўшимча қилишича, постларни қўриқлаш Миллий гвардия ва ДХХ ходимларига топширилган.
Эслатиб ўтамиз, вилоятлар чегараларидаги назорат постлари Президент Шавкат Мирзиёевнинг Олий Мажлисга 2017 йилги мурожаатномасидан сўнг олиб ташланган эди. Президент бундай постларнинг «эскича жойлашуви ҳаракатланиш эркинлигини чеклаб, савдо-иқтисодий муносабатлар, ички ва ташқи туризм ривожига салбий таъсир кўрсатаётгани»ни таъкидлаган эди.
«Ўзингиз ўйланг, бугунги кунда мамлакатимиз ҳудудида 60 дан зиёд бундай пост мавжуд. Энди тасаввур қилинг, оддий одам Хоразмдан Тошкентга машинасида бормоқчи бўлса, йўлда 17 та постдан ўтади. Фарғона водийсидан келаётган киши эса 8 та ана шундай постга дуч келади», — деганди давлат раҳбари ўшанда.
