Ироқ ҳукумати бош вазир истеъфога чиққанига қарамай ўз вазифаларини бажаришда давом этади. Бу ҳақда Ироқ вазирлар маҳкамаси томонидан расмий баёнот берилган, деб хабар қилган «ТАСС».
«Ҳукумат аъзолари бош вазир истеъфосидан кейин вазифасини бажарувчи мақомини олади ва тўлиқ ҳажмда ўз ваколатларини бажаришда давом этади», — дейилади Ироқ вазирлар маҳкамасининг баёнотида.
30 ноябрь, шанба куни вазирлар маҳкамасининг фавқулодда мажлисидан кейин бош вазир Одил Абдул Маҳдий парламентга истеъфо сўраб мурожаат йўллаган.
Абдул Маҳдий Олий суд раҳбари билан маслаҳатлашувдан кейин ўз лавозимидан кетишга қарор қилган.
«Истеъфога чиқишим мамлакатдаги инқирозга барҳам бериш учун ҳам зарур аҳамият касб этади. Бошқарувимдаги вазирлар маҳкамаси қийин шароитларда шакллантирилганди ва миллий қутқарув ҳукумати сифатида фаолият олиб борди», — дейди собиқ бош вазир.
Одил Абдул Маҳдий ва ҳукумат вакиллари иқтисодиётга кўмак бериш учун жуда кўп ишлар амалга оширилганини таъкидлаб, мамлакатда давом этаётган норозилик намойишлари ҳамда хавфсизлик соҳасидаги вазият ислоҳотлар ва лойиҳаларни амалга оширишга халақит қилмаслигига умид билдирган. У Ироқ ҳукуматини 2018 йил 24 октябрда қабул қилиб олганди.
Ироқ конституциясига кўра, бош вазир истеъфоси депутатлар томонидан тасдиқланиши лозим. Парламентда энг кўп овоз олган номзод янги бош вазир лавозимини эгаллаш учун ҳаракатларни бошлайди, президент унга ҳукумат шакллантиришни ишониб топширади. Ушбу жараёнга қонунчиликка мувофиқ 15 кун вақт ажратилади. Муддат тугагач янги ҳукумат раҳбарига ўз маҳкамасини шакллантириш учун бир ой вақт берилади.
Айни вақтда шиалар ҳаракати етакчиси Муқтад ас-Садр унинг «Саирун» сиёсий гуруҳи қонунчилик органида фракция аъзоларининг сони бўйича устунликка эга бўлса ҳам янги ҳукумат таркибига киришга интилмаслигини билдирган. «Саирун» гуруҳи фракция аъзолари сони бўйича парламентда иккинчи ўринда турган «Фатҳ» сиёсий блоки билан аввал ҳукуматда нефть вазирлиги лавозимида фаолият олиб борган Абдул Маҳдий шакллантирган маҳкамани қўллаб-қувватлаганди.
Изоҳ (0)