Афғонистон бош вазири президент администрацияси ишлаб чиққан мамлакатда тинчлик ўрнатиш ҳақидаги ҳужжат лойиҳасини танқид қилди

Афғонистон президенти Муҳаммад Ашраф Ғанининг администрацияси ишлаб чиққан «Толибон» ҳаракати билан тинчлик келишуви афғон жамияти томонидан жиддий қабул қилинмаяпти. Ижро ҳокимияти раҳбари Абдулла Абдулла ушбу ҳужжат лойиҳасини танқид қилди. Бу ҳақда «Afghanistan.ru» хабар берди.

Афғонистон бош вазири «Толибон» ва АҚШ ўртасидаги музокаралар тўхтаган вақтда жамоатчилик муҳокамасига қўйилган йўл харитасини жиддий ҳужжат деб ҳисоблаш мушкул эканлигини таъкидлади.

«Йўл харитаси» лойиҳасида Афғонистон ҳукумати ҳамда «Толибон» ҳаракати ўртасида икки томонлама келишув асосида ҳудудда тинчлик ўрнатиш учун музокаралар олиб бориш кўзда тутилган.

«Ушбу еттита банддан иборат йўл харитасини лойиҳа дейиш ҳам қийин, буни орзу-ниятлар рўйхати деса тўғрироқ бўлса керак», – дея таъкидлаган Абдулла Абдулла.

Шунингдек, бош вазир Афғонистон ҳукумати вакиллари ҳам «Толибон» ҳаракати билан музокараларда сайловлар натижасидан қатъи назар иштирок этиши зарурлигига урғу берди.

Афғонистонда президентлик сайловлари 28 сентябрда ўтказилган. Овоз бериш жараёнлари «Толибон» ҳаракатининг сайловларни бузишга уриниш ҳақидаги баёнотидан сўнг хавфсизлик чоралари кучайтирилган вазиятда ўтди. Бироқ сайловлар олдидан ва сайловлар ўтказиладиган санада мамлакат бўйлаб терактлар, портлашлар, кузатувчиларнинг ўғирлаб кетилиши ҳолатлари кузатилган. Сайловларда жами 15 нафар президентликка номзод иштирок этди, кураш уч асосий сиёсий гуруҳ ўртасида кечди: амалдаги президент Муҳаммад Ашраф Ғани, амалдаги бош вазир Абдулла Абдулла ҳамда мухолифат, яъни собиқ президент Ҳамид Карзай гуруҳи. Сайловлардан кейин дастлабки натижаларининг эълон қилиниши кечикиши ва иккинчи тур ўтказилиши тахмин қилинди, кейинроқ Афғонистон Мустақил сайлов комиссияси раиси овоз бериш натижаларини эълон қилиш кечиккани учун узр сўради. Президентлик сайловларининг дастлабки натижалари 14 ноябрда ёки ундан кейин эълон қилинади.