ХТВ Навоийда мактаб дезинфекция қилинмагани учун 4 ўқувчи гепатитга чалингани ҳақидаги хабарга изоҳ берди

Навоий вилояти Хатирчи тумани тиббиёт бирлашмаси жорий йилнинг 2 ноябрь куни ижтимоий тармоқда «Қишлоқда 4 ўқувчи гепатитга чалинган, ота-оналар иддаосича, мактаблар дезинфекция қилинмаган» сарлавҳаси остида тарқалган танқидий мақола юзасидан маълумот берди.

«Халқ тилида ‘Сариқ касаллик’ деб номланувчи ‘Вирусли гепатит А’ касаллиги қўзғатувчиси ‘Гепатит А’ вируси ҳисобланиб, у жигар тўқимасига паталогик таъсир ўтказади. Одатда касаллик шамоллаш, ҳолсизлик, кўнгил айниши, нажас ва сийдик рангининг ўзгариши белгилари билан кечади. Шунинг учун ушбу белгилар билан намоён бўлувчи бошқа турдаги касалликларни истисно қилиш, юқумли касалликларни эрта муддатларда аниқлаш мақсадида ушбу беморларнинг барчаси туман юқумли касалликлар шифохонасида қондаги ‘IgF’ специфик антителалари миқдори аниқланиши орқали касаллик тасдиқланган беморлар шифохонага ётқизилади. Аксинча, тасдиқланмаган беморлар хонадонига қайтарилади.

Мақолада келтириб ўтилган 4 нафар ўқувчи ҳақиқатда туман юқумли касалликлар шифохонасига ‘УРВК, вирусли гепатит А’ ташхиси билан келтирилган. Уларнинг 2 нафарида клиник – эпидемиологик ва специфик текшириш натижаларига асосланиб, ‘Вирусли гепатит А’ ташхиси тасдиқланган. Қолган 2 нафар ўқувчида ‘Вирусли гепатит А’ ташхиси тасдиқланмаганлиги сабабли уларга хонадонига кетишга рухсат берилган. Лангар қўрғонида ‘Вирусли гепатит А’ касаллиги бўйича эпидемиологик вазият назорат остига олиниб, профилактика ва эпидемияга қарши тадбирлар ўтказилмоқда. Барча беморлар ва мулоқотда бўлганлар тиббий кузатув остига олиниб, аҳоли ва мактаб ўқувчилари ўртасида ‘Вирусли гепатит А’ касаллиги профилактикаси бўйича санитария ва тарғибот ишлари кучайтирилган.

Мактаблар дезинфекция қилинмаганлиги эса ҳақиқатга зиддир. Чунки 2019 йил 23 апрелда Хатирчи тумани Дезинфекция станцияси ва Хатирчи тумани ХТБ ўртасида Профилактик дезинфекция ишларини олиб бориш учун 16-рақамли шартнома имзоланган. Унга асосан тумандаги барча мактабларда дезинфекция ишлари мунтазам равишда олиб борилмоқда. Шу боис мақоладаги мактаблар ўз фаолиятини давом эттирмоқда.

Туманда ‘Вирусли гепатит А’ касаллиги тарқалишининг олдини олиш мақсадида 2610 нафар 14 ёшгача бўлган болалар ихтиёрий равишда касалликка қарши эмланган бўлса, улардан 200 нафари бевосита Навоий вилояти ҳокимлиги ҳомийлиги остида эмланди», — дейилади хабарда.