Чироқчи туманининг «Сувлиқ» қишлоғидаги симёғочлар чириб, эрта-индин қулаш арафасига келган. Аҳоли эса қулаган симёғочдаги электр токи одамлар ҳаётига хавф туғдиришидан хавотирда. Бу ҳақда журналист Ўктам Садинов Facebook’даги саҳифасида маълум қилди.
Чироқчи туманининг Чиял хўжалигидаги «Сувлиқ» қишлоғи менга бегона эмас! Яқинда ўзим туғилиб ўсган қишлоқда бўлдим. Қишлоқдаги кекса отахонлар билан учрашиб, уларнинг қувонч ва дардларига шерик бўлдим. Айниқса, Нурмамат бобо Йўлдошев ва Нордавлат бобо Паёновларнинг шикояти мени ўйлантириб қўйди. Уларнинг айтишича, яшаётган уйлари атрофидаги симёғочлар ўз муддатини ўтаб бўлган. Симлар дарахтларга чирмашиб кетган. Бунинг устига бетон устунларга беркитилган симёғочлар чириб, нураш арафасида турибди. Узилган симларни қўлбола усулда дарахтларга иплар орқали боғлаб қўйишган. Эрта ё индин токли симлар узилиб кимнингдир устига тушиб, ҳалокат юз бермаслигига ким кафолат беради?Ўктам Садинов, журналист
Ўктам Садинов ушбу аянчли аҳволни ўз кўзи билан кўргач, қўрқиб кетганини ёзади. Унинг айтишича, қишлоқ аҳли бу муаммо юзасидан туман ҳокимлиги-ю, вилоят раҳбарларигача ҳатто прокуратурага ҳам мурожаат қилган. Аммо натижа йўқ. Икки йил ичида қишлоқ аҳли бормаган ташкилот қолмаган.
Журналист исбот сифатида аянчли манзараларни суратга олиб, ижтимоий тармоқ фойдаланувчилари эътиборига ҳавола қилди. Ва вилоятнинг янги раҳбари Зоир Мирзаев яқинда кадрларни алмаштирганини айтиб, ушбу муаммо ҳам вилоят раҳбари эътиборига тушишига умид билдирди.
Эслатиб ўтамиз, май ойида «Дарё»да Фарғона вилояти Риштон тумани «Хуррамобод» қишлоғи аҳолиси қўлбола симёғочлардан фойдаланаётгани ҳақида мақола эълон қилинганди. Шундан сўнг икки кун ичида қишлоққа янги симёғочлар ўрнатилганди.
Изоҳ (0)