Сурхондарё вилоятининг Термиз шаҳрида газ сизиб чиқаётган хонадонда қамалиб қолган 2 ёшли бола вилоят Фавқулодда вазиятлар бошқармаси ходимлари томонидан қутқарилди. Бу ҳақда вилоят Фавқулодда вазиятлар бошқармаси матбуот хизмати «Дарё»га хабар берди.
Маълум бўлишича, 4 ноябрь, душанба куни соат 12:37 да вилоят Фавқулодда вазиятлар бошқармаси тезкор навбатчилик гуруҳига Термиз шаҳар Алишер Навоий кўчаси 11-уй 16-хонадонда яшовчи фуқаро И.Қ.дан мурожаат келиб тушган. Мурожаатда фуқаро хонадонининг эшиги ичкаридан қулфланиб қолиб, 2 яшар фарзанди уйда ёлғиз қолганини маълум қилади.
Хабарда айтилишича, фавқулодда вазиятлар бошқармаси ходимлари тезкорлик билан воқеа жойига етиб бориб, уй эшигини очганда газ плитаси устидаги чойнак қайнаб, олови ўчган ва газ сизиб чиқаётган бўлган.
Бошқарма ходимлари ҳаракати билан 2 ёшли бола ота-онасига соғ-саломат топширилган.
Бундан аввал Навоий вилояти Фавқулодда вазиятлар бошқармаси кўп қаватли уйларнинг бирида қамалиб қолган бир ёшли болакайни қутқарган эди. Орадан кўп ўтмай Навоий шаҳрида келин ва қайнона ўз квартирасида қулфланиб қолгани ҳақида хабар берилган эди.
Изоҳ (0)