Ички ишлар вазирлиги ҳузуридаги Тергов департаментининг хабар беришича, 19 октябрь куни соат 17:30 да Б.Д. ва танишлари А.А. ҳамда «И» исмли шахслар билан кўчада кетаётган Н.Ҳ.га тегишли 500 000 сўмлик Samsung Galaxy А6 телефонини қўнғироқ қилиб олиш баҳонасида олиб А.А.га тегишли Nexia-2 автомашинасида ҳодиса жойидан яширинган.
Кўрилган тезкор чора-тадбирлар натижасида Б.Д. ва А.А. ушланган. Ҳолат юзасидан 30 октябрь, чоршанба куни Миробод тумани 3-сонли ички ишлар бўлими ҳузуридаги тергов бўлинмаси томонидан Жиноят кодексининг 166-моддаси 2-қисми «в» банди (талончилик, бир гуруҳ шахслар томонидан олдиндан тил бириктириш) билан жиноят иши қўзғатилган.
Дастлабки тергов ҳаракатлари давомида А.А. ва Б.Д. муқаддам бир неча маротаба талончилик жиноятини содир этганлиги аниқланиб, уларга нисбатан Жиноят кодексининг 166-моддаси 3-қисми «а» банди (такроран содир этилган талончилик) билан айблов эълон қилиниб, «қамоққа олиш» тарзидаги эҳтиёт чораси қўлланилган.
«Шу билан бирга, ҳозирда «И» исмли номаълум шахсни аниқлашга қаратилган тезкор-қидирув чора-тадбирлари кўрилмоқда.
Агарда сиз ҳам ушбу шахслар ҳаракатларидан жабр кўрган бўлсангиз, Тошкент шаҳар Миробод тумани ИИО ФМБнинг 71-291-58-02, 71-230-38-75 ва 71-230-38-43 рақамлари орқали мурожаат қилинг», — дейилади Тергов департаментининг ахборотида.
Изоҳ (0)