Тошкентнинг Мирзо Улуғбек туманидаги қатор мактабларда Ўзбекистон Президенти томонидан белгилаб берилган ёшларда ҳарбий ватанпарварлик руҳини тарбиялаш борасидаги вазифалар ижроси юзасидан ижодий учрашувлар ўтказилди. Бу ҳақда Мудофаа вазирлиги Ахборот ва оммавий коммуникациялар департаменти «Дарё»га маълум қилди.

Хусусан, тумандаги 222 ва 256-сонли умумтаълим мактабларига Ўзбекистон давлат санъат ва маданият институти талабаларининг ташрифи амалга оширилди. Мудофаа вазирлигининг масъул офицерлари ҳамроҳлигидаги бу учрашувлар мактаб жамоаси ва ўқувчилар учун ҳақиқий санъат кунига айланди.

«Биз шаҳарда туғилиб, шу ерда вояга етяпмиз. Шу пайтгача халқ амалий чолғу асбоблари ҳақида кўп нарса билмасдик. Бахшичилик асосан воҳада ривожланган. Телевизорда уларни кўрганман; тоғу адирлар қўйнида достон айтишади. Шаҳарда, кўп қаватли бинолар атрофида достон айтилаётганини эса кўрмаганман. Бугун илк бор достон айтаётган бахши, чанқовуз овозини эшитдим», — дейди 222-мактабнинг 10-синф ўқувчиси Камолахон Азимова.

Учрашувда халқ достонларидан термалар айтилди. Эстрада йўналишидаги замонавий ашулаларнинг бахшичилар тилидан, улар оҳангида жаранг сочгани эса ўқувчилар учун янгилик бўлиб, илиқ кутиб олинди.

Шу куннинг ўзида бу каби тадбирлар туманнинг 18 та умумтаълим мактабида ўтказилиб, Мудофаа вазирлиги спорт клуби спортчилари ва ҳарбий хизматчилар томонидан спорт бўйича ҳам ўқувчилар ўртасида мусобақалар ташкиллаштирилди.