Эрон ташқи ишлар вазирлиги Россия президенти Владимир Путин ҳамда Туркия давлат раҳбари Ражаб Тоййиб Эрдўғон ўртасида Сурияда қўшма патрул тадбирлари ўтказилиши ҳақидаги меморандум имзоланганини қўллаб-қувватлади, деб ёзмоқда «РИА Новости».

«Эрон Суриянинг ҳудудий яхлитлиги ва миллий сувернитетини сақлаб қолиши йўлида амалга оширилган ҳамда ҳудуддаги вазиятни ўнглашга қаратилган ҳар қандай ҳаракатни қўллаб-қувватлайди», — дея таъкидлаган Эрон ташқи ишлар вазири Аббос Мусавий.

Аввал Эрдўғон Россия билан қўшма патрул тадбирлари Туркия чегарасидан Сурия ичкарисига томон 10 километр кенгликда амалга оширилишини маълум қилган.

Туркия ташқи ишлар вазири Мевлют Чавушўғли патрул тадбирлари Сурия шимоли-шарқида курдлар истиқомат қиладиган Қамишли вилоятини четлаб ўтишини билдирган.

Анқара 9 октябрда Сурия шимоли-шарқида «Сурия демократик кучлари», Курдистон ишчи партияси курд жангарилари ҳамда ИШИД террорчиларини чегара ҳудудидан қувиб чиқариш ва у ерда Туркиядаги қочоқлар учун «хавфсиз зона» ташкил қилиш мақсадида «Тинчлик булоғи» ҳарбий операциясини бошлаган.

17 октябрда Туркия ва АҚШ расмийлари Анқарада Суриядаги «Тинчлик булоғи» операциясини курдлар чегара ҳудудидан чиқиб кетиши учун 120 соатга тўхатишни келишиб олганди. Курдларнинг ҳудудни тарк этиши бўйича масъулият Вашингтон зиммасига юклатилган. Шунингдек, АҚШ Туркияга нисбатан қўлланилган санкцияларни ҳам бекор қилишга рози бўлганди.22 октябрь, сешанба куни Россия президенти Владимир Путин ҳамда Туркия давлат раҳбари Ражаб Тоййиб Эрдўғон Сочида Суриядаги вазиятни муҳокама қилган ва қочоқлар учун «хавфсиз зона» ташкил қилишда қўшма патрул тадбирларини амалга ошириш юзасидан меморандум имзолаган.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.