Чехияда Россия жосуслик тармоғи фош этилди. Бу ҳақда мамлакат хавфсизлик ва ахборот хизмати (BIS) раҳбари Михаил Коуделка маълум қилди, дея хабар беради «Интерфакс».
«Бу тармоқ аниқланди ва буткул йўқ қилинди. У Россия разведка хизматлари билан боғлиқ бўлган, ушбу мамлакат ҳамда Россия элчихонаси молиялаштирадиган одамлар томонидан тузилган», — дейди BIS раҳбари.
Коуделкага кўра, тармоқ аъзолари интернет орқали Чехия ва бошқа мамлакатлардаги нишонларга ҳужум қилишни режалаштирган. Мазкур тармоқ Россия томонидан бошқа Европа давлатларида яратилган йирик структуранинг бир қисми ҳисобланади. Бироқ BIS раҳбари ушбу давлатлар номини ошкор қилмади.