Россиядаги ҳар ўнинчи компания 2020 йилда ишчи-ходимлар сонини қисқартиришни режалаштирмоқда. HeadHunter иш берувчилар ўртасида ўтказган сўров натижалари шундан далолат бермоқда, дея маълум қилади «Известия».
Бу кўрсаткич бир йил аввал ўтказилган шундай сўров натижаларидан икки баравар кам бўлди: ўшанда ҳар бешинчи фирмада ходимларни қисқартириш режаси борлиги билдирилганди.
Жорий йилги сўровда қатнашган компанияларнинг ярмидан кўпи (55 фоиз) 2020 йилда меҳнатга ҳақ тўлаш фондини ошириш ниятида. Фирмаларнинг 62 фоизи штатларни кенгайтиришни мўлжаллаган, 49 фоизи эса ҳолатини барқарор деб баҳолаган.
Россия Меҳнат вазирлигига кўра, 1 октябрь ҳолатига мамлакатда 662,2 минг ишсиз бўлиб, қайд этилган ишсизлик даражаси 0,9 фоизни ташкил этган.