Ўзбекистон адлия вазири Русланбек Давлетов 18 октябрь, жума куни Буюк Британиянинг Юридик университети (ULaw) раҳбарияти билан Ўзбекистонда ушбу университет филиалини ташкил этиш лойиҳасини тезкор амалга ошириш юзасидан музокаралар ўтказди, дея хабар бермоқда ЎзА.
Томонлар Тошкентда университет филиалини ташкил этиш бўйича ҳаракатлар режасини батафсил муҳокама қилган ва ишчи гуруҳ таркибини тасдиқлаган. Шунингдек, лойиҳа босқичлари, ўқув дастурлари ва молиялаштириш масалалари ҳам муҳокама қилинган.
Лойиҳа талабаларга бизнесни бошқариш бўйича бакалавр дастурларини, Ўзбекистон қонунчилигининг ўзига хос жиҳатларини ва халқаро савдо ҳуқуқи йўналишида LLB бўйича таълим беради.
Маълумот учун, ULaw (University of Law) — Буюк Британиянинг нотижорат хусусий университети бўлиб, ҳуқуқшунослик, ихтисослаштирилган юридик таълим ва Британия ҳуқуқшунослари ва юристлари учун узлуксиз таълим курсларини тақдим этади.
Эслатиб ўтамиз, Тошкент шаҳридаги Халқаро юридик университет Вазирлар Маҳкамасининг 2019 йил 24 сентябрдаги қарорига биноан ташкил этилмоқда.
Изоҳ (0)