Тошкент шаҳрида 240 нафар фуқарони Жанубий Кореяга иш юборишни ваъда қилиб, фуқаролардан жуда кўп миқдорда пул олган хусусий бандлик агентлиги раҳбарига нисбатан жиноий иш очилди. «Дарё» мухбири ушбу масала юзасидан суриштирув ўтказди.

Мирзо Улуғбек туманида жойлашган «Profelite imp хусусий бандлик агентлиги» жамияти раҳбари Иброҳимжон Ж.нинг Жанубий Кореяга ишга юбориш ваъдаларига ишониб, миллионлаб сўм тўлаб қўйган ўнлаб фуқаролар пулларини қайтариб олиш учун ички ишлар органларига мурожаат қилган.

Чет элда ишлаш илинжида бандлик агентлигига 42 миллион сўм пул тўлаган Дилёрбек Тўйчиевнинг «Дарё»га маълум қилишича, жамият раҳбари уни Жанубий Кореяга ишга юборишни айтиб, икки йилдан буён турли баҳоналар билан алдаб келмоқда.

«Икки йил аввал, 2017 йил октябрь ойида Иброҳимжон Ж. мени 3–6 ой орасида Жанубий Кореяга ишга жойлаштириб қўйишини айтди. Бунинг учун Global work resources жамиятининг ҳисоб рақамига 42 миллион сўм ўтказишимни сўради. Ушбу маблағни тўладим ва 1 ноябрь куни шартнома туздим. Лекин шартномага Global work resources жамияти муҳри эмас, Atlant kapital инвестиция фонди акциядорлик жамияти муҳри босилган экан. Иброҳим акадан нима учун муҳр бошқа эканлигини сўраганимда, англашилмовчилик бўлганлигини айтди», — деди жабрланувчи.

Дилёрбек Тўйчиевнинг таъкидлашича, орадан олти ой вақт ўтса-да, ваъда бажарилмаган.

«Кейинроқ жўнатаман, ана бўлади, мана бўлади, деб вақтни чўзиб юрди. 2019 йилнинг февраль ойида аввал тузилган шартномани бекор қилиб, иккинчи марта «Profelite imp хусусий бандлик агентлиги» билан Ўзбекистон фуқароларининг хорижга ишга жойлаштириш бўйича хизматлар кўрсатиш тўғрисида шартнома имзолашимни сўради ва мен рози бўлдим. Бу шартномани ҳам муддати тугади, лекин натижа йўқ. Шундай қилиб орадан икки йил ўтиб ҳам кетди. Кореяга ишга кетишимга ишониб бошқа иш ҳам қилолмадим. Бўлмайди демайди, рўйхат келяпти, ўн кунда бўлади, бир ойдан кейин бўлади, деб одамни ишонтириб юрди», — дейди Дилёрбек Тўйчиев.

Пулни олиш учун бир неча уринишлари зое кетгандан кейин Тўйчиев жамиятни Фуқаролик ишлари бўйича Мирзо Улуғбек туманлараро судига ариза берган. Унинг ягона илинжи суддан бўлиб турибди.

Исмини ошкор этишни истамаган тошкентлик фуқаронинг айтишича, у икки йил аввал савдо қилиб турган дўконини сотиб, агентликка 42 миллион сўм тўлаган. У ҳам дастлаб Global work resources жамияти билан шартнома тузган ва кейинчалик келишув «Profelite imp хусусий бандлик агентлиги» билан алмаштирган.

«Икки йилдан буён Иброҳимжон Ж. Кореяга ишга жўнатишини айтиб, мени ишонтириб келди. Бу орада икки марта ўзаро шартнома туздик. Охирги вақтларда пулни сўрайверганимдан кейин 12 миллион сўм пул берди. Шундан кейин мана ҳозиргача иш бўлади, деб ваъда бериб юрибди», — дея қўшимча қилди у.

Корхона раҳбари Иброҳимжон Ж. билан бирга ишлаган агентнинг билдиришича, агентликка фуқаролар жалб қилган агентлар ҳам муаммолар гирдобида қолган.

«Мен каби агентлар одамларни Жанубий Кореяга ишга жўнатишни ваъда қилиб олиб келган. Улар агентлик раҳбаридан эмас, пулни биздан талаб қиляпти. Кимдир 10, кимдир 20, кимдир эса 40 миллион сўм берган. Иброҳимжон Ж. ҳатто, бирга ишлаган — бизни ҳам алдаб келмоқда», — деди агент.

Унинг қўшимча қилишича, Иброҳимжон Ж. билан муаммолар анча олдин бошланган.

«Ҳар куни тўполон, ўзини ўлдирмоқчи бўлганлар ҳам бўлди, оиласи билан ажралиш ёқасига келиб қолганлар ҳам бор. Агентлик ижарада турган бино эгаси ҳам жойни қайтариб олди. Одамлар тўпланиб агентлик раҳбарини уйигача бордик, лекин уни тополмадик ва ҳалигача у билан учрашиш имкони бўлмаяпти. Телефонда гаплашиб турибмиз, аммо у биз билан кўришишни истамаяпти. Жанжаллардан саломатлигим ҳам оғирлашиб қолди», — дейди хусусий бандлик агентлигининг ходими.

«Хусусий бандлик агентликлари тўғрисида»ги қонун 2018 йил 16 октябрда қабул қилинган. Қонун билан илк марта хусусий бандлик агентликларига Ўзбекистон ва унинг ташқарисида фуқароларни ишга жойлаш билан шуғулланишлари учун рухсат берилган эди.

Аниқланишича, Ўзбекистон бандлик ва меҳнат муносабатлари вазирлиги «Profelite imp хусусий бандлик агентлиги» жамиятига 2019 йил 12 апрель куни Ўзбекистондан ташқарида иш излаётган шахсларни ишга жойлаштириш фаолияти билан шуғулланишига рухсат берувчи лицензия тақдим этган. Лекин Иброҳимжон Ж. четга ишга юборишни ваъда қилиб фуқаролардан икки йил аввал пул олишни бошлаган.

Иброҳимжон Ж.га яқин манбалардан бирининг «Дарё»га маълум қилишича, у икки йил аввал одамларни ишга жўнатишни ваъда қилган, лекин пулларни қабул қилишда ўқишга тайёрлаш учун деб олган. Сўраганларга бу шунчаки расмиятчилик эканлигини айтган.

Ташқи меҳнат миграцияси масалалари агентлиги директори вазифасини бажарувчи Бахтиёр Турсуновнинг «Дарё» мухбирига маълум қилишича, «Profelite imp хусусий бандлик агентлиги» фаолиятини тугатиш бўйича ариза берган.

«Аввалроқ ушбу хусусий бандлик агентлиги ўз фаолиятини тугатиш мақсадида бизга мурожаат қилган эди. Бундан ташқари, фуқаролардан агентлик устидан арз келиб тушганди. Шунинг учун, агентликнинг фуқаролар олдида молиявий мажбуриятлари бор ёки йўқлиги, қонун бузилиш ҳолатлари содир этган ёки этмаганлигини аниқлаш мақсадида ҳуқуқни муҳофаза қилувчи органларга сўров бердик. Улардан агентлик раҳбарига нисбатан жиноий иш очилганлиги ва тергов ишлари олиб борилаётгани ҳақида маълумот олдик. Ҳозирча агентликка берилган лицензия бекор қилингани йўқ. Тергов ишлари якунланиб, суд жараёнлари тугагандан сўнг бир хулосага келишимиз мумкин. Ушбу ишни ўз назоратимизга олганмиз», — деди Бахтиёр Турсунов.

Мирзо Улуғбек тумани ИИО ФМБ бошлиғи ўринбосари, подполковник Қосимжон Раҳимбердиевнинг маълум қилишича, Мирзо Улуғбек туманида жойлашган «Profelite imp хусусий бандлик агентлиги» жамияти ҳозирги вақтга қадар 240 нафар фуқаро билан шартнома тузган. Улардан 50 нафари ички ишлар органларига жабрланувчи сифатида ариза билан мурожаат қилган.

«Мурожаат асосида агентлик раҳбари Иброҳимжон Ж.га нисбатан Жиноят кодексининг 168-моддаси (фирибгарлик) бўйича жиноят иши очилди. Ишнинг катталиги ва айни вақтда муҳимлигини ҳисобга олиб, Тошкент шаҳар ички ишлар бош бошқармаси тергов бошқармаси терговни иш юритувга олди», — деди Қосим Раҳимбердиев.

Иброҳимжон Ж.га нисбатан тергов ишини олиб борган Мирзо Улуғбек тумани ИИО ФМБ 1-сонли ички ишлар бўлими тергов бўлими бошлиғи, капитан Фурқат Лутпидиновнинг айтишича, ҳозирда тергов ҳаракатлари кетмоқда.

«Воқеа жойи ва гувоҳлар кўрсатмалари ўрганилмоқда. Гумонланувчи (агентлик раҳбари) ўз адвокати билан терговга келди ва етказилган моддий зарарни қоплаб беришга ваъда берди», — деди Фурқат Лутпидинов.

Тошкент шаҳар ИИББ матбуот хизмати сентябрь ва октябрь ойларида ўз расмий сайти орқали Иброҳимжон Ж.га нисбатан икки марта фирибгарлик жинояти бўйича иш очилгани ҳақида маълумот берди. Иброҳимжон Ж. 2019 йил 5 февраль куни 25 ёшли Дилшод Ш.га уни Жанубий Кореяга жўнатиб, ишга киритишни ваъда берган. Шу ваъда билан жабрланувчидан 4 минг доллар ва 12 миллион сўм пул олган, бироқ берган ваъдасини бажармаган. Шунингдек, Иброҳимжон Ж. Фозил Б.нинг ишончига кириб, уни Жанубий Кореяга ишга жўнатишини ваъда қилган. Ўзининг «хизматлари» учун 15 миллион 310 минг сўм олиб, ваъдасида турмасдан, пулларни ўз эҳтиёжига сарфлаб юборган.

«Дарё» мухбири суриштирув давомида «Profelite imp хусусий бандлик агентлиги» жамиятининг юридик манзили кўрсатилган бинода агентлик фаолият юритмаётганини аниқлади. Агентликнинг Бандлик ва меҳнат муносабатлари вазирлигининг хусусий бандлик агентликлари реестрида кўрсатилган телефон рақамлари ишламаяпти. Юқорида келтирилган важларга изоҳ олиш учун гумонланувчи Иброҳимжон Ж. билан боғланиш имкони бўлмади.

Фуқароладан «Profelite imp хусусий бандлик агентлиги» жамияти ёки Иброҳимжон Ж. билан боғлиқ қонун бузилиш ҳолати юзасидан Тошкент шаҳар ички ишлар бош бошқармасига мурожаат қилишлари сўралади.

Муаллиф:Мусулмонбек Иброҳимов