Ижтимоий тармоқларда маккажўхори ўғриси ва уни изза қилган Миришкор тумани ҳокими ҳақидаги видео тарқалди. Унда ҳоким маккажўхори ўғирлашда гумон қилинган фуқарони ҳақоратлагани акс этган.

Фото: «Дарё»

Ушбу видео юзасидан Миришкор тумани ҳокими Равшан Комиловдан изоҳ олиш мақсадида туманда бўлган «Дарё» мухбири Отабек Қўлдошевнинг ёзишича, «Маккажўхори» воқеаси 2019 йил 29 сентябрь куни рўй берган.

Аниқланишича, маккажўхори ўғирлашда айбланаётган видеодаги шахс туманнинг «Гулистон» қишлоғида яшовчи фуқаро Сайфулла Муҳаммадиев.

Миришкор тумани ҳокими «Дарё» мухбири билан суҳбати аввалида видеодаги овоз ҳақиқатан ҳам ўзиники эканлигини тасдиқлади.

Видеодан англашилишича, Миришкор тумани ҳокими Равшан Комилов фуқарони ўғриликда гумон қилиб, койийди. Набираларини ҳам ўғирлик қилишга ўргатаётганликда айблайди. «Тадбиркор хорижга сотишни мақсад қилган маккажўхорини ҳамма олиб кетаверса, экспорт нима бўлади?» — дея савол беради ҳоким. Ўғирликда айбланаётган киши эса набираларининг қистови билан маккажўхори олганини айтади ва уларни уришади.

Туман ҳокими Равшан Комиловнинг иқрорича, видеони ўзи тасвирга олган. Сўнгра маккажўхори етиштираётган тадбиркорга Telegram ижтимоий тармоғи орқали жўнатган ва ўғриликдан хабардор қилган. Тадбиркор эса маккажўхори етиштираётган фермерга ҳолатни маълум қилган. Турган гапки, фермер ишчисига ўғриликни видео орқали маълум қилиб, уни эътиборсизликда айблаган. Хуллас, ҳокимнинг ўзи суратга олган видео яна ҳоким ташаббуси билан ижтимоий тармоқларда ҳам тарқалади. Кейинги воқеалар эса ўзингизга аён.

«Дарё» мухбири Равшан Комилов билан суҳбати давомида ўғирланган ҳамда қайтариб олинган маккажўхорилар нега ҳоким автомобилига солингани билан ҳам қизиқди.

— Маккажўхорини исбот сифатида ўзим олдим ва ҳудуд профилактика инспекторига топширдим, — дейди Равшан Комилов. — Уруғининг килоси 1 доллардан ошиқ маблағга сотиб олинаётган маккажўхори гектаридан 10 тонна ҳосил беради. Маҳсулот экспорти ҳақида мен қайғурмасам, ким қайғуради?

Айтишларича, ўғирланаётган маккажўхори гектаридан 10 тонна ҳосил беради. Ҳосилнинг ҳар килоси эса хорижда 1 доллардан ошиқ маблағга сотилади.

— Тадбиркор меҳнатини қадрлаганим ва туманнинг экспорти ҳақида қайғурганим учун ҳам маккажўхори ўғирлаётган кишини койидим, — дейди Равшан Комилов. — Ҳолатни кўриб, жаҳлим чиққани рост. Бироқ мен айтган қўпол сўзлар бошқа бировга қаратилмаган. Яъни ҳеч кимни ҳақоратламадим. Тўғри, ҳоким сифатида қўпол сўзларни умуман ишлатмаслигим керак эди. Хато қилдим ва хатойимни англаб етдим. Бунинг учун халқимиздан узр сўрайман ва бу ҳолат такрорланмаслигига ваъда бераман.

Тадбиркор Нодирбек Раҳмоновнинг маълумот беришича, 1 тонна 800 кило уруғ Испаниядан 15 минг АҚШ доллари эвазига шартнома асосида келтирилган.

— Маккажўхори экилган ер майдони «Қурбонов Холмурод» фермер хўжалигига ери ҳисобланади, — дейди туман ҳокими ўринбосари Ғанишер Файзиев. — Тумандаги ғалладан бўшаган ер майдонларига такрорий экин сифатида маккажўхори, сабзи ва дуккакли маҳсулотлар етиштиришни мақсад қилган фермерлар «Миришкор строй центр» МЧЖ раҳбари Нодирбек Раҳмонов билан шартнома тузиб, маккажўхори уруғини буюртма асосида келтирган.

Туман ҳокимлиги ахборот хизматидан маълум қилинишича, жорий йилда Нодирбек Раҳмонов раҳбарлигидаги МЧЖ Миришкор туманидан Россия ва Қозоғистон давлатларига 1,5 миллион долларлик маҳсулот экспорт қилишини режалаштирган ва ҳозирга қадар 417 минг долларлик дуккакли маҳсулотлар экспорт қилинган.

Айни пайтда фермер хўжалиги етиштирган 600 тонна маккажўхори дони хорижга экспорт қилиниши мўлжалланмоқда.

Туман ҳокимининг маҳсулот экспорти ҳақида қайғуриши таҳсинга лойиқ, албатта, аммо у фуқарога нисбатан тилга олиб бўлмайдиган қўпол сўзларни ишлатмаслиги ва изза қилмаслиги керак назаримизда. Хусусан, буни кузатиб турган болалар қаршисида.