АҚШ Шинжон-Уйғур мухтор туманида уйғурлар, этник қозоқлар ва бошқа кам сонли мусулмон миллатлар вакиллари қўлга олиниши ҳамда зулм қилиниши учун жавобгар бўлган Хитой ҳукумати ва Коммунистик партияси аъзоларига нисбатан виза чекловларини жорий этди.
Чекловлар Хитой мансабдорларининг оила аъзоларига ҳам татбиқ этилиши мумкин.
«Қўшма Штатлар Хитой Халқ Республикасини Шинжондаги репрессив кампанияни зудлик билан тўхтатиш, барча асоссиз қўлга олинганларни қўйиб юбориш, хорижда яшаётган Хитой мусулмонларини уларни мавҳумлик кутаётган ватанига қайтишга мажбурлашга уринишларни бас қилишга чақиради», — дейилади Қўшма Штатлар Давлат котиби Майкл Помпеонинг 8 октябрь, сешанба куни эълон қилинган баёнотида.
Шунингдек, АҚШ Савдо вазирлиги Шинжондаги репрессив сиёсатга алоқадор 28 ташкилотга маҳаллий маҳсулотлар экспорт қилинишига чеклов ўрнатди.
Ўз навбатида, Хитойнинг АҚШдаги элчихонаси виза чекловлари ва бошқа тақиқлар халқаро муносабатлар меъёрларига зид эканлигини билдирган.
«Шинжонда инсон ҳуқуқлари борасида муаммолар йўқ. Вашингтоннинг айбловлари ички ишларга аралашув учун баҳона бўлиб хизмат қилмоқда. Шинжонда терроризм ва экстремизм кўринишларига қарши кўрилаётган чоралар халқаро амалиётга мос келади ва бу ерда истиқомат қилаётган турли миллатга мансуб 25 миллион киши томонидан қўллаб-қувватланади», — дейилади элчихона баёнотида.
Изоҳ (0)