ИИБ Навоий—Зарафшон йўлидаги «сунъий йўл нотекислиги» ЙТҲларга ва одамлар ўлимига сабаб бўлаётгани ҳақидаги хабарларга муносабат билдирди
Навоий вилояти ИИБ интернетда «сунъий йўл нотекислиги»га доир тарқатилган маълумотлар юзасидан раддия берди.
Тармоқда тарқалган хабарларга кўра, Навоий—Зарафшон автомобиль йўлининг чўлдан ўтадиган қисмида сунъий тўсиқ ўрнатилган куни ҳеч қандай огоҳлантирувчи йўл белги бўлмаган. Шунингдек, камида 7 та машина тўсиқдан катта тезликда ўтиб, бошқарувни йўқотиб, ЙТҲга учрагани, бунинг оқибатида икки нафар одам ўлгани, оғир тан жароҳати олганлар ҳам борлиги таъкидланган.
Вилоят ИИБнинг «Дарё»га маълум қилишича, Навоий вилояти ҳудудидаги халқаро аҳамиятга эга А-379 йўлида (Конимех тумани ҳудудида) сўнгги 4 йил ичида содир этилган ЙТҲлар таҳлил қилинганида, жами 64 та кўнгилсиз ҳодисалар содир этилгани кузатилган. Шундан, ҳалок бўлганлар сони жами 33 нафар, жароҳатланганлар сони эса 57 нафардан иборат бўлиб, ухлаб қолганлар 70 фоизни ташкил қилган.
Йўл транспорт ҳодисаларининг олдини олиш мақсадида Вазирлар Маҳкамасининг 2019 йил 9 апрелдаги «Йўл ҳаракати қоидаларига ўзгартириш ва қўшимчалар киритиш тўғрисида»ги қарорига асосан А-379 йўлида сунъий йўл нотекислиги ўрнатилган. 1.31-‘Сунъий йўл нотекислигиъга шарҳ берилиб, йўлнинг сунъий нотекислик ўрнатилган қисмига яқинлашаётганлиги тўғрисида огоҳлантириши, транспорт воситасининг ҳаракатланиш тезлигини мажбурий тарзда камайтириш учун қўлланилиши тушунтирилган.
«Сунъий йўл нотекислигининг баландлиги 2—2,5 сантиметр бўлиб, у ҳеч қандай йўл транспорт ҳодисасини келтириб чиқармайди. Аксинча, бир хил манзарани ташкил этувчи олис масофадаги йўлларда ҳаракатланиб бораётган автомашинада ухлаб қолган ҳайдовчини сергакликка ундайди. Бу эса ўз навбатида ҳар қандай транспорт воситаси билан содир этилиши мумкин бўлган кўнгилсиз ҳодисаларнинг олдини олишга хизмат қилади», — дейилади вилоят ИИБ баёнотида.
