Давлат божхона қўмитаси «Ғишткўприк» божхона постидаги автомобиллар тирбандлиги юзасидан тарқалган хабарга муносабат билдиради

Давлат божхона қўмитаси 29 сентябрь куни ижтимоий тармоқларда Қозоғистон Республикасининг «Жибек жоли» божхона постидан Ўзбекистоннинг «Ғишткўприк» божхона постига киришда навбатда турган енгил автотранспорт воситалари тўғрисида тарқалган хабарларга муносабат билдирди.

Республиканинг автомобиль йўлларида жойлашган чегара божхона постлари орқали ҳаракатланган автотранспорт воситалари сони 2018 йилда (1 222 000 та) 2016 йилга нисбатан (361 000 та) қарийб 3,5 баробарга ортган. Чегара божхона постлари орқали ҳаракатланган автотранспорт воситаларининг 46 фоизи Қозоғистон билан чегарадаги божхона постларига тўғри келмоқда.

Жорий йилнинг 1 сентябридан 28 сентябрь кунига қадар республика чегара божхона постлари орқали жами 164 648 та (ўртача 1 кунда 5 880 та) автотранспорт воситалари ҳаракатланган бўлиб, «Ғишткўприк» божхона постидан жами 13 756 та (ўртача 1 кунда 491 та) автотранспорт воситалари ҳаракатланган. Ушбу божхона пости орқали ҳаракатланаётган автотранспорт воситалари сони республика чегаралари орқали ҳаракатланаётган жами автотранспортларнинг қарийб 10 фоизини ташкил этмоқда.

Бу жараёнда, «Ғишткўприк» божхона постида ҳар бир автотранспорт воситасининг божхона расмийлаштирувига ўртача 5 дақиқа 50 сония вақт сарфланмоқда.

Сутка давомида ҳаракатланган автотранспорт воситалари бўйича маълумотлар интернет тармоғидаги Давлат божхона қўмитасининг расмий сайтига реал вақт режимида жойлаштириб борилмоқда.

«Республикамиз иқтисодий хавфсизлигини таъминлаш, божхона назоратини амалга ошириш, контрабанданинг олдини олиш божхона органларининг асосий вазифаларидан ҳисобланади. Шундай экан, бу борада божхона органларига юклатилган вазифаларни бажаришда доимий равишда зарур чора-тадбирлар амалга ошириб келинаётганлигини билдирамиз», — дейилади хабарда.