Ўзбекистон Президенти Шавкат Мирзиёев 2019 йил декабрида Японияга сафар қилиши кутилмоқда. Бу ҳақда Президент матбуот хизмати ва ЎзА хабар бермоқда.
Шавкат Мирзиёев 20-сентаб куни беш мамлакатнинг Ўзбекистондаги янги элчиларидан, хусусан, Япония элчиси Ёшинори Фужиямадан ишонч ёрлиғини қабул қилиб олган эди.
Ушбу воқеа ҳақида хабар бераркан, Президент матбуот хизмати жумладан шундай деб ёзади: «Жорий йил декабрь ойида Японияда бўлиб ўтадиган олий даражадаги учрашув ва музокаралар кенг кўламли ўзаро манфаатли ҳамкорликни сифат жиҳатидан янги даражага олиб чиқишга хизмат қилишига ишонч билдирилди».
Ўз навбатида, элчи Фужияма Ўзбекистон Миллий ахборот агентлиги (ЎзА)га берган интервьюсида Шавкат Мирзиёевнинг бўлажак ташрифи Япония учун жуда муҳимлигини таъкидлаган.
«Менинг Ўзбекистонга дипломатик миссиям давлатингиз раҳбарининг Японияга ташрифига тайёргарлик даврига тўғри келди. Шавкат Мирзиёев бу ташриф самарали ва ҳар томонлама манфаатли бўлиши кераклигини қайд этди. Биз бунинг учун барча чораларни кўрамиз. Ўзбекистон раҳбарининг бўлажак ташрифи Япония учун жуда муҳим. Чунки Ўзбекистон Марказий Осиёда барқарорлик ва тараққиётни таъминлашда муҳим ролга эга. Ўзбекистон Президентининг Японияга ташрифи муносабатларимизда туб бурилиш ясайди», — деди элчи.
Маълумот учун, Ўзбекистон Президенти Японияда сўнгги бор 2011 йилда ташриф билан бўлган.
Изоҳ (0)