Футбол бўйича Англия Премьер лигасининг 6-тури доирасида 22 сентябрь, якшанба куни 2 та ўйин якунланди.
Унаи Эмери қўл остидаги Лондоннинг «Арсенал» клуби «Эмирейтс» стадионида «Астон Вилла»ни қабул қилди.
Учрашув давомида «тўпчилар» вакиллари Николя Пепе (59, пенальти), Кэлум Чемберс (81) ҳамда Пьер-Эмерик Обамеянг (84) биттадан голга муаллифлик қилган бўлса, меҳмонлардан Жон Макгинн (20) ва Уэсли Мораес (60) ўз номига биттадан гол расмийлаштириб қўйди.
Шу тариқа «Арсенал» ўз майдонида кечган баҳсда «Астон Вилла»ни 3:2 ҳисобида мағлубиятга учратиб, муҳим 3 очкони қўлга киритди.
Мазкур ғалабадан сўнг «Арсенал»нинг очкоси 11 тага етди ва жамоа мусобақа жадвалида 4-ўринда бормоқда. «Астон Вилла» эса 4 очко билан 18-ўринни банд қилиб турибди.
Турнинг марказий баҳсида Фрэнк Лэмпард бошқарувидаги Лондоннинг «Челси» клуби «Стемфорд Бриж»да Юрген Клопп бошлиқ «Ливерпуль» жамоаси билан баҳсга киришди.
Тўқнашувнинг 14-дақиқасида «Ливерпуль» ҳимоячиси Трент Александр-Арнольд Муҳаммад Салоҳ узатган тўпни «аристократлар» дарвозасига жойлаб қўйган бўлса, 30-дақиқага келиб, бразилиялик Роберто Фирмино ҳисобни 2:0 кўринишига олиб келди. 71-дақиқада эса лондонликлар ярим ҳимоячиси Нголо Канте ҳисобни қисқартирди (2:1).
Учрашув 2:1 ҳисобида «Ливерпуль» фойдасига якунланди ва Клопп жамоаси ўз ҳисобига муҳим 3 очкони ёздириб қўйди.
Маълумот учун, мусобақа жадвалида пешқадамлик қилаётган «Ливерпуль» очколари сонини 18 тага етказиб олган бўлса, «Челси» 8 очко билан 11-ўриндан жой олди.
6-тур якунига кўра мусобақа жадвалидаги ҳолат:
АПЛ
6-тур баҳслари
22 сентябрь, якшанба
«Арсенал»—«Астон Вилла» 3:2
Голлар: 0:1 — 20 Макгинн, 1:1 — 59, пенальти Пепе, 1:2 — 60 Уэсли, 2:2 — 81 Чемберс, 3:2 — 84 Обамеянг«Челси»—«Ливерпуль» 1:2
Голлар: 0:1 — 14 Александер-Арнольд, 0:2 — 30 Фирмино, 1:2 — 71 Канте«Челси»: Аррисабалага, Томори, Эмерсон (Алонсо, 15), Кристенсен (Зума, 42), Аспиликуэта, Канте, Ковачич, Маунт, Жоржиньо, Виллиан, Абраҳам (Бацҳуайи, 77)
«Ливерпуль»: Адриан, Матип, Робертсон, Александер-Арнольд, ван Дейк, Ҳендерсон (Лаллана, 84), Вейналдум, Фабиньо, Мане (Милнер, 71), Фирмино, Салоҳ (Гомес, 90)
Огоҳлантиришлар: Томори (20), Александер-Арнольд (57), Фабиньо (78), Ковачич (84), Милнер (86), Алонсо (90)
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)