19 сентябрь, пайшанба куни Тошкентда биринчи бор бепул метро куни бўлиб ўтди. Тошкент шаҳри илк бора қўшилган Европа ҳаракатланиш ҳафтасида дунёнинг 50 мамлакатидан 3000 га яқин шаҳарлар иштирок этди, деб хабар беради «Gazeta.uz».
Кун давомида пойтахт ер ости йўлакларида театр-мусиқавий намойишлар, ҳарбий ва симфоник оркестрнинг, шунингдек, иллюзионист ва аниматоларнинг чиқишлар намойиш этилди, метро тарихига оид фотокўргазмалар ўтказилди. Йўловчилар раққосалар гуруҳининг поезд вагонларидаги чиқишларидан баҳраманд бўлди.
Эслатиб ўтамиз, 22 сентябрь куни аҳоли ва меҳмонларга автомобилларини қолдириш ва Учтепа туманининг Лутфий кўчаси бўйлаб пиёда юриш таклиф қилинади. Мазкур кўча кун бўйи автомобиллар учун ёпиқ бўлади, кўнгилочар ва маърифий тадбирлар ўтказилади.
