«Ўзбеккино» Миллий агентлиги раҳбарияти Лондонда BBC Broadcasting House компанияси вакиллари билан учрашди. Бу ҳақда агентлик матбуот хизмати маълум қилди.
Учрашув доирасида сўнгги 3 йил ичида Марказий Осиёда юз берган ўзгаришлар, жумладан, Ўзбекистон ва Афғонистон ўртасидаги муносабатларнинг қайта тикланиши ва бу ўзгаришлар оддий одамлар, умуман, минтақа ҳаётига қандай таъсир кўрсатаётгани ҳақида ҳикоя қиладиган бир қатор ҳужжатли фильмларни суратга олиш бўйича келишувга эришилди.
Бундан ташқари, тарихий ва маданий йўналишда ҳам қатор фильмлар яратишга келишиб олинди. Бу рўйхатда Ўрта Осиёнинг биринчи фотосуратчиси ва ўзбек киносининг асосчиси Худойберган Девонов ҳақидаги фильм етакчилик қилади.
Компаниянинг АҚШ ва Европа давлатларида бизнесни ривожлантириш бўйича раҳбари Фредерик Дурман учрашув чоғида BBC Ўзбекистон билан жадал ва самарали халқаро ҳамкорликни ривожлантиришдан мамнун эканлигини, янги лойиҳаларнинг амалга оширилиши нафақат Ўзбекистонда, балки бутун дунёда BBC аудиториясини кенгайтиришини таъкидлади.
«Катта Лангар Қуръони: Афсона ва ҳақиқатлар» лойиҳасининг муваффақиятли амалга оширилиши BBC ва Ўзбекистон ўртасидаги ҳамкорликнинг муваффақиятли намунаси бўлди. Ушбу фильм орқали биз жаҳон, айниқса Яқин Шарқ аудиториясига Ўзбекистоннинг бой маданий мероси, шунингдек, маърифатпарвар ислом ғоялари ҳақида маълумот беришга ҳаракат қилдик», — деди Яқин Шарқ минтақаси бўйича журналистика бўлими бошлиғи Салим Патка учрашув давомида.
Ўз навбатида, «Ўзбеккино» Миллий агентлиги Бош директори Фирдавс Абдуҳолиқов ҳамкорликда нафақат ҳужжатли фильмлар яратиш, балки Ўзбекистондаги ёш ҳужжатли кино усталарининг ижодий савиясини оширишга қаратилган ўқув семинарларини мунтазам равишда ўтказиш муҳимлигини таъкидлади.
Изоҳ (0)