Ўзбекистонда ИИВ боғчалари Мактабгача таълим вазирлиги тизимига ўтказилди
Ҳукуматнинг «Ўзбекистон Республикаси Ички ишлар вазирлигининг мактабгача таълим муассасалари фаолиятини такомиллаштириш чора-тадбирлари тўғрисида»ги қарори қабул қилинди. Бу ҳақда «Ҳуқуқий ахборот» канали маълум қилди.
Ушбу қарорга асосан Ички ишлар вазирлиги тасарруфидаги болалар боғчалари истисно тариқасида ИИВ идоравий мансублигида қолдирилган ҳолда Мактабгача таълим вазирлиги тизимига ўтказилди.
Қарорга кўра, ушбу боғчаларнинг таълим-тарбия жараёнини мувофиқлаштириш ва методик бошқариш Мактабгача таълим вазирлиги томонидан амалга оширилади.
ИИВ болалар боғчалари раҳбарлари Мактабгача таълим вазирлиги билан кэлишилган ҳолда ички ишлар вазири томонидан лавозимга тайинланади ва лавозимидан озод этилади.
ИИВ болалар боғчалари ходимларига давлат мактабгача таълим муассасалари ходимлари учун белгиланган меҳнатга ҳақ тўлаш шартлари ва имтиёзлари қўлланилади.
2019 йил 1 октябрдан:
ИИВ болалар боғчалари тарбияланувчилари умумий ўринлари сонининг 80 фоизи ички ишлар органлари ходимлари ва ҳарбий хизматчиларининг фарзандлари учун ажратилади;
20 фоизи эса Болаларни давлат мактабгача таълим муассасаларига қабул қилиш бўйича давлат хизматлари кўрсатишнинг маъмурий регламентларига мувофиқ жамланади.
