Японияда 13 сентябрь, жума куни таэквондо бўйича Чиба—2019 Гран-приси старт олди. Мусобақанинг илк кунида ўзбекистонлик спортчи Светлана Осипова ўз жангларини ўтказди.
Осипова уч нафар рақибасини мағлуб этиб, ярим финалга чиқди. Бироқ Светлана финал йўлланмаси учун кечган баҳсда Рио—2016 Олимпиадаси чемпиони, хитойлик Зенг Шуйинга ютқазиб қўйди (0:3).
Маълумот учун, ушбу мусобақада 22-ўринда сараланган Осипова ҳар сафар ўзидан юқорида турган спортчиларни мағлуб этди. Дастлаб 11-ўриндаги Ана Тепавас (4:0) доғда қолдирилди, сўнгра 6-сараланган таэквондочи мексикалик Брисеида Акоста (20:6) таслим этилди. Чорак финалда ўзбекистонлик спортчи Лондон—2012 Олимпиада ўйинлари олтин медали эгаси, ушбу мусобақада 3-сараланган сербиялик Милица Мандични (5:4) мағлуб этди.
Эслатиб ўтамиз, Ўзбекистон терма жамоаси вакиллари Нигора Турсунқулова 14 сентябрь, Никита Рафалович 15 сентябрь куни мусобақада иштирок этади.
Янада кўпроқ таэквондо ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)