Ижтимоий тармоқларда жорий йилнинг 4 июнь, 12 июль ҳамда 9 сентябрь кунлари Сурхондарё вилояти Денов тумани «Бободеҳқон бозори» МЧЖ собиқ раиси Норқул Сафаровнинг туман ҳокимлиги раҳбарияти ва ходимларига пора берганлиги тўғрисида хабарлар тарқалган эди.
Денов туман ҳокимлиги мазкур хабарлар бўйича суриштирув ўтказди.
Денов тумани ҳокимлиги Facebook ижтимоий тармоғида жойлаштирилган ушбу мазмундаги хабар ва унга илова қилинган рўйхатни ҳар томонлама тўла ва холисона ўрганиш мақсадида туман прокуратурасига тақдим қилди.
Денов тумани ички ишлар органлари фаолиятини мувофиқлаштириш бошқармасининг жавоб хати орқали ижтимоий тармоқларда тарқалган хабарда келтирилган ҳолат атрофлича ўрганиб чиқилганлиги ва унда келтирилган важлар ўз исботини топмаганлиги маълум қилинди.
«Шуни инобатга олиб, жамиятдаги барча жараёнларга бефарқ бўлмаган фуқароларимиздан Денов тумани ҳокимлиги ходимларини обрўсизлантириш мақсадида ижтимоий тармоқда такрор ва такрор тарқатилаётган бу ёлғон ахборотга ишонмасликларини сўраймиз.
Ижтимоий тармоқлардаги гуруҳ администраторлари ҳамда шахсий аккаунт эгаларига эса аҳоли орасида турли миш-мишлар пайдо бўлишига, уларда салбий фикр ва ишончсизликни шакллантиришга олиб келадиган ушбу мазмундаги туҳматли гаплар ва ёлғон маълумотларни тарқатиш қонун олдида жавобгарликни келтириб чиқаришини эслатиб ўтамиз», — дейилади хабарда.
Изоҳ (0)