Ўзбекистонлик тадбиркор, Халқаро бокс федерацияси собиқ раҳбари Ғофур Раҳимов ўзини АҚШнинг санкцион рўйхатига киритилишини ноқонуний деб топилишини талаб қилмоқда, деб хабар беради Sputnik.
Раҳимов АҚШ молия вазирлиги хорижий активлар устидан назорат қилиш бўйича офиси устидан судга арз қилган.
Собиқ совет иттифоқидан келган муҳожирларнинг жиноий ташкилоти — «Қардошлар доираси» ёки «Биродарлар» фаолиятига алоқадорликда гумон қилинганлиги сабабли тадбиркор 2012 йилда санкцион рўйхатга киритилган эди.
Бироқ, АҚШ молия вазирлиги 2017 йилда айбловни ўзгартирди ҳамда Раҳимовни жиноий авторитетларни қўллаб-қувватлаганликда айблади. Айблов ортидан Раҳимовнинг АҚШ ўз юрисдикциясидан топиши мумкин бўлган барча мол-мулки музлатилган.
«OFAC’нинг рўйхатида қарийб саккиз йилдан бери бўлиш Раҳимовга молиявий зарар келтирмоқда, унинг обрўйига таъсир кўрсатмоқда», — дейилади даъво аризасида.
У 2018 йилдан бери OFAC’дан санкциялар юзасидан қарорни асословчи ҳужжатни олишга муваффақиятсиз уриниб келмоқда.
Даъвода айтилишича, Раҳимов унинг санкцияга киритилиши қайта кўриб чиқилишига асос бўлувчи муҳим маълумотлар ва юридик хулосаларни тақдим этган. Бироқ, бу сўров бўйича тўлиқ жавоб ололмаган.
Раҳимовнинг адвокатлари молия вазирлигининг бундай ҳаракатлари АҚШ қонунлари ва даъвогар ҳуқуқларига зидлигини таъкидламоқда.
Эслатиб ўтамиз, Ғофур Раҳимов жорий йилнинг июль ойида AIBA раҳбарлигидан бутунлай кетгани, унинг ўрнига Муҳаммад Мустасан Халқаро бокс ассоциацияси президенти лавозимига тайинлангани ҳақида хабар берилганди.
Изоҳ (0)