Хавфли вирус юз минглаб Android фойдаланувчиларининг ёзишмаларини ўғирлагани маълум бўлди

Киберхавфсизлик бўйича тадқиқотчилар Joker номли янги хавфли троянни аниқлади, деб хабар беради BleepingComputer.

Joker трояни Google Play дўконидаги 24 та дастурда аниқланган бўлиб, фойдаланувчилар томонидан 472 минг маротаба кўчириб олинган.

Троян гаджетларга зарарланган дастурий таъминотни юклаш учун мўлжалланган. У ўз қурбонининг қурилмасидаги маълумотларни йиғади, телефон рақамлари ва матнли хабарлардан нусха кўчиради. Олинган маълумотлар шифрланган ҳолда жиноятчиларнинг серверига юборилади.

Шунингдек, механизм кликер функциясини (фойдаланувчига реклама сайтлари билан ишлаётгандек тасаввур уйғотади) ҳосил қилади ва юзернинг СМС кодларидан фойдаланиб премиум-сервисларга «обуна» қилиб қўяди.

Зарарли дастур фақатгина айрим давлатларнинг фойдаланувчиларига мўлжалланган бўлиб, ҳужум бўйича АҚШ, Австралия, Буюк Британия, Франция, Германия ва Ҳиндистондан бўлган фойдаланувчилар шикоят қилган.

Google ҳозирда зарарланган барча дастурларни ўзининг расмий дўконидан ўчириб ташлаган.