Ўзбекистон Республикаси Президенти Шавкат Мирзиёев 26 август, душанба куни Самарқанд шаҳрида БМТнинг таълим, фан ва маданият масалалари бўйича ташкилоти (UNESCO) бош директори Одри Азулени қабул қилди. Бу ҳақда Президент матбуот хизмати хабар берди.
Давлат раҳбари олий мартабали меҳмонни қутлар экан, Ўзбекистон ва UNESCO ўртасидаги конструктив мулоқот изчил ривожланиб, шериклик муносабатлари мустаҳкамланиб бораётганини қайд этди.
Одри Азуленинг ушбу нуфузли халқаро институт бош директори сифатидаги мазкур илк ташрифи ўтган йили Париж шаҳрида бўлиб ўтган учрашувнинг мантиқий давоми экани, шунингдек, устувор йўналишларда ўзаро манфаатли ҳамкорликни мустаҳкамлаш борасида томонларнинг интилиши қатъий эканидан далолат бериши таъкидланди.
Бугунги кунда UNESCO томонидан Ўзбекистон учун биринчи марта қабул қилинган Мамлакат дастури доирасида устувор йўналишлар бўйича қўшма чора-тадбирлар самарали амалга оширилмоқда.
Ўзбек халқининг ноёб маданий-тарихий меросини асраш соҳасида ҳамкорлик қилиш ва бу борадаги алмашинувларни фаоллаштиришга алоҳида эътибор қаратилмоқда.
Жаҳоннинг илғор тажрибасини чуқур ўрганиш ва жалб этиш мақсадида Ўзбекистонда UNESCO кафедралари тармоғи кенгаймоқда. Мамлакатнинг етакчи олий таълим муассасаларида «Дунё динларини қиёслама тадқиқ этиш», «Сув дипломатияси, сув ресурсларини бошқариш ва атроф-муҳит муҳофазаси», «Маданият туризми» каби кафедралар очилмоқда.
UNESCO кўмагида мамлакатда «Шарқ тароналари», бахшичилик санъати, ҳунармандчилик фестиваллари, Мақом санъати анжумани каби қатор йирик халқаро тадбирлар ташкил этилмоқда.
Учрашувда кенг кўламли шерикликни янада ривожлантириш, жумладан, Жаҳон мероси қўмитасининг навбатдаги сессияси якунида эришилган келишувларни сўзсиз амалга оширишнинг долзарб масалалари муҳокама қилинди.
Ўзбекистонда маданий мерос объектларини ривожлантириш ва асраш соҳасидаги саъй-ҳаракатларни давом эттириш муҳимлиги қайд этилди. Бугун Самарқандда шу мавзуга бағишлаб муваффақиятли ўтказилган қўшма халқаро конференция натижалари юксак баҳоланди.
Маданият, таълим ва фан, гендер сиёсат йўналишларида ҳамда экология, жумладан, Орол фожиаси оқибатларини бартараф этиш йўналишида амалий ҳамкорлик имкониятлари кўриб чиқилди.
UNESCO бош директори самимий қабул учун давлат раҳбарига миннатдорлик билдирди.
Ўзбекистонда бой маданий меросни асраб-авайлаш, туризм салоҳиятини рўёбга чиқариш, таълим ва фан, атроф-муҳит муҳофазаси соҳаларида муҳим ўзгаришларни амалга ошириш борасидаги ислоҳотлар ижобий натижалар бераётгани мамнуният билан қайд этилди.
UNESCO Ўзбекистон билан кенг кўламли шерикликни бундан буён ҳам ривожлантириш ва мустаҳкамлашда қатъий экани тасдиқланди.
Изоҳ (0)