«Фарғона шаҳридаги Корея халқаро университетини ташкил этиш тўғрисида» ҳукумат қарори қабул қилинди (714-сон, 23.08.2019 йил). Бу ҳақда Адлия вазирлигининг «Ҳуқуқий ахборот» Telegram канали хабар берди.
Университет республика иқтисодиёт ва саноат тармоғини ривожлантириш бўйича муҳим вазифаларни ҳал этишга қодир бўлган юқори малакали кадрларни халқаро таълим стандартлари даражасида тайёрлайди.
Университет нодавлат олий таълим ташкилоти сифатида ташкил этилади.
Университетда ўқитиш тўлов-контракт асосида корейс, инглиз ва ўзбек тилларида кундузги таълим шаклида амалга оширилади. Битирувчиларга Ўзбекистон Республикасида тан олинадиган белгиланган намунадаги диплом берилади.
Университетда биринчи ўқув йилида 9 та йўналишда, 2021/2022-ўқув йилидан бошлаб 14 та йўналишда мутахассислар тайёрланади.
Ҳужжат ҳақидаги тўлиқ маълумот билан www.lex.uz сайти орқали танишиш мумкин.