Обамеянг Салоҳга, Эмери эса Клоппга қарши. «Ливерпуль»—«Арсенал» тўқнашуви ҳақида

Хаёл

Ички чемпионат дегани шундай бўлса-да. Биринчи турда «Нефтчи» «Пахтакор» билан, иккинчисида «Бунёдкор» «Локомотив» билан, кейингисида эса «Насаф» «Пахтакор». Мана буни ҳақиқий миллионлар ўйини деса бўлади. Англияликларга эса қойил қолмадик. Шу ҳам чемпионатми?! Янги мавсумнинг илк турида «Манчестер Юнайтед» ўз уйида «Челси»ни пўстагини қоқиб қўйди. Иккинчи турда «Манчестер Сити» ва «Тоттенҳэм» 2:2 ҳисобидаги қаёқдаги драмани мухлисларга тақдим этди. Вей, учинчи турга келиб «Ливерпуль»ни «Арсенал»га рўбаро қилиб турибди. Шу ҳам чемпионатми а, лаббай? Ўрганмайсанми бизниклардан? Чемпионат бошланишига саноқли кунлар қолганда жамоалар сонини осмондан тушгандек кўпайтириб қўйишни қаёқдан ҳам биларди, бу содда инглизлар. Ҳа, майли бир кун ўрганиб кетишар. Ахир биз осмондаги юлдузларни санаб юрган пайтимизда улар латта коптокни тепиб юришарди.

Вой, нималар деб ташладик. Ўзимизга келамиз ва ички хотиржамликни ушлаймиз. Бир алаҳсираб олдик-да, азиз мухлис. «Нефтчи»нинг аллақачон Суперлигада эмаслигидан гап нима ҳақида эканлигини тушунганингизга ишонамиз. Кайфиятни кўтариб олган бўлсангиз, келинг Англия Премьер лигаси 3-туридан ўрин олган марказий ўйин: «Ливерпуль»—«Арсенал» тўқнашуви ҳақида суҳбатлашамиз.

АПЛнинг ортда қолган 2-турида 100 фоизлик натижа қайд этган Мерсисайд ва Лондон клуби бугун «Энфилд» стадионида мусобақанинг якка ҳокимлиги учун майдонга тушади. «Ливерпуль» дастлабки икки турда мос равишда «Норвич»ни 4:1, «Саутҳэмптон»ни эса 2:1 ҳисобида таслим қилди. «Тўпчилар» эса аввалига «Ньюкасл»дан кичик 1:0 ҳисобида устун келган бўлса, ўтган турда Эмери шогирдлари «Бёрнли» устидан 2:1 ҳисобидаги ғалабани тантана қилди. Хўш, бугун қайси жамоа ғалаба қозонади?

Ўзи нима гап?

Кетма-кет икки турда «Ливерпуль» ўз дарвозасидан гол олиб чиқди. Ўтган йилги метин ҳимоянинг хизматлари битдими дерсиз? Йўқ, ҳозирча асло ундай эмас. Жамоанинг асосий посбони Алиссон илк турдаёқ жароҳат олди. У майдонда бўлган 39-дақиқа ичида «қизиллар» гол ўтказмаган. Жамоага эндигина қўшилган Адриан иккинчи турга келиб, «Саутҳэмптон» футболчиси (вақтида «Ливерпуль»да тўп сурган) Дэнни Ингз олдида ҳаяжонланиб қолдими, хуллас Миньоле ва Кариус туширган қовунлардан бирини ўз ҳисобига ёздиришга «муваффақ бўлди». Эндрю Робертсон, Виржил ван Дейк ва Трент Александер-Арнолд эса ўзининг ишончли ҳаракатларини давом эттирмоқда. Аммо нима бўлганда ҳам «Арсенал»нинг ҳужум триоси — Ляказетт—Обамеянг—Пепега қарши туриш осон бўлмайди. Алиссон бўлганда эса «Ливерпуль»нинг дарвоза чизиғи борасидаги хавотирларимизни ўринсиз ҳисоблайверсак бўларди. Бироқ бу сафар ундай эмас. Клоппнинг ҳужум чизиғидан кўнгли тўқ. Мане—Салоҳ—Фирмино триоси ҳар қандай ҳимояни, айниқса, «Арсенал»никини парчалаб ташлашга қодир. Нега ундай дейсизми? Ўтган мавсум «Ливерпуль» «Энфилд»да Бернд Лено дарвозасига нақ 5 та гол урганди. Бу сафар «канонирлар» Лоран Косельни, Эктор Белерин каби футболчилар хизматидан фойдалана олмайди. Косельни Францияга кўч-кўронини йиғиштириб кетган бўлса, Бельерин ҳамон жароҳатини тиклаш билан овора. «Челси»дан келган Давид Луиз эса ҳали клубга мослашиб улгурмаганини ҳисобга олиш лозим. Бундан ташқари «Селтик»дан харид қилинган Киран Тирни ҳали жароҳатдан қутулмаган. Кўриб турганингиздек муаммолар етарлича. Умуман олганда эса «Арсенал»нинг ҳимоясига нисбатадан «Ливерпуль»ники каби «ишончли» таърифини бериб бўлмайди. Бироқ юқорида таъкидлаганимиздек, «Арсенал»нинг ҳужум триоси ҳам чакки эмас. Камига ўтган ўйинда қаҳрамонлик кўрсатган Дани Себальос ҳам бор. Хуллас, азиз мухлис, бугун сиз-у бизни ҳақиқий футбол спектакли кутмоқда!

Қизиқарли фактлар

• «Ливерпуль» АПЛ доирасидаги ўз майдонидаги сўнгги 39 та ўйинда ютқазмади
• «Ливерпуль» АПЛнинг сўнгги 11 та ўйинида камида 2 тадан гол урмоқда
• «Ливерпуль» сўнгги  11 та ўйиндан 8 тасида рақиблар дарвозасига камида 2 та гол урган
• «Ливерпуль» «Арсенал»га қарши сўнгги 4 та уй учрашувида камида 3 тадан гол урди
• Роберто Фирмино ҳисобида ҳозирда АПЛда урилган 49 та гол бор. Агар у бугун гол урса, мусобақа тарихида 50 та гол урган илк бразилиялик футболчи бўлади
• «Ливерпуль» «Арсенал»га қарши сўнгги 3 та уй учрашувида ғалабани ўзиники қилган
• «Арсенал» сўнгги 8 та ўйинда «Ливерпуль»ни мағлуб эта олмаган: 4 та дуранг, 4 та мағлубият
• «Арсенал» 2004/05 йилги мавсумдан бери илк бор мавсумни кетма-кет учта ғалаба билан бошлаши мумкин
• Юрген Клопп «Арсенал»га қарши АПЛда 7 марта тўқнаш келган ва бирор марта ютқазмаган: 4 та ғалаба, 3 та дуранг.