Президент, унинг оила аъзолари ҳамда Ўзбекистонга ташриф буюрган хорижий давлатлар раҳбарларини қўриқлаш Президент хавфсизлик хизматига юклатилади. Олий Мажлис Сенати қатор қонун ҳужжатларига мазкур масала бўйича тузатишлар киритишни кўзда тутган қонунни маъқуллади, дея хабар бермоқда «Gazeta.uz».
«Терроризмга қарши кураш тўғрисида»ги қонунга киритилган ўзгартишга мувофиқ, Президентнинг 2018 йил 21 февралдаги қарори билан ташкил этилган Ўзбекистон Президенти давлат хавфсизлик хизмати терроризмга қарши кураш бўйича давлат органлари рўйхатига киритилди.
Авваллари Ўзбекистон Президенти, шунингдек, хорижий давлатлар, ҳукуматлар ва халқаро ташкилотлар раҳбарларининг мамлакат ҳудудида бўлиб турган вақт давомидаги хавфсизлиги ва ҳимояси бўйича ваколатлар Давлат хавфсизлик хизматига тегишли эди. Эндиликда ДХХнинг бу ваколатлари бекор қилинади.
ПДХХ қўриқланувчи шахслар доимий ёки вақтинчалик бўлиб турадиган объэктлар ҳамда улар ҳаракатланадиган йўналишлар хавфсизлигини ҳам таъминлайди.
«Ҳуқуқбузарликлар профилактикаси тўғрисида»ги қонунга киритилган қўшимчага кўра, ПДХХ ҳуқуқбузарликлар профилактикаси бўйича ваколатларга эга бўлди. Улар қўриқланувчи шахслар манфаатлари, хавфсизлиги ва даҳлсизлигига алоқадор ҳуқуқбузарликларга мойил шахслар ҳисобини юритади.
Изоҳ (0)