Олмаотада бир миллионта дарахт экилади

Кузда Қозоғистоннинг Олмаота шаҳрида бир миллионта дарахт экилиши режалаштирилмоқда. Бу ҳақда шаҳар ҳокими Бакитжан Сагинтаев ўз Instagram’ида маълум қилди, деб ёзади Tengrinews.

«Шаҳримизни кенг кўламда кўкаламзорлаштириш масалалари бўйича мажлис ўтказдим. Ҳозир Олмаотада 2,2 миллионта дарахт бор, аммо уларнинг 550 мингтаси авариявий ва касал ҳолатда. Кузда уч йиллик Jasyl Almaty лойиҳасини амалга оширишни бошлашни таклиф қиламан, унинг доирасида бутун шаҳар бўйлаб бир миллиондан кам бўлмаган дарахт экилади», — деб ёзди ҳоким.

Сагинтаевнинг таъкидлашича, янги микротуманлар, кўчалар, ҳовлиларни кўкаламзорлаштириш, бутун мегаполис бўйлаб аҳоли учун янги хиёбонлар, скверлар, боғлар, дам олиш ҳудудларини яратиш лозим.