Ахборот ва оммавий коммуникациялар агентлигида Ўзбекистон Республикаси Соғлиқни сақлаш вазирлиги мутасаддилари иштирокида журналистлар билан очиқ мулоқот бўлиб ўтди. Бу ҳақда Ахборот ва оммавий коммуникациялар агентлиги хабар қилди.
Маълум қилинишича, соҳадаги мавжуд муаммоларни ҳал қилиш ва эндокрин касалликларнинг олдини олиш, эрта ташхислаш ва даволаш мақсадида Миллий дастур, чора-тадбирлар комплекси, «Йўл харитаси» белгилаб олинган.
Сўнгги икки йил ичида ҳудудларда эндокринология соҳасини комлекс ривожлантириш, моддий-техник базасини мустаҳкамлаш борасида олиб борилган саъй-ҳаракатлар натижасида вилоятлардан пойтахтга келиб мурожаат қилувчилар қарийб 3 баробарга қисқаргани таъкидланди. Айни пайтда мамлакат бўйлаб 650 нафардан зиёд эндокринолог шифокор фаолият юритмоқда.
Тадбир давомида Соғлиқни сақлаш вазирлигининг 2018 йил 25 октябрдаги буйруғига асосан, пилот вилоятларда 45 ёшдан ошган аҳоли орасида қандли диабет скрининги ўтказилаётгани ҳақида маълумот берилди. Шунингдек, қандли диабетнинг сурункали асоратларини камайтириш, уларнинг юзага келишини кечиктиришга ва беморларнинг ҳаёт сифатини яхшилашга йўналтирилган онлайн регистр ишлаб чиқилмоқда.
«2015 йилда қандли диабет билан касалланган 170 минг 536 нафар бемор рўйхатга олинган эди. Бугунги кунга келиб эса, 230 минг 610 нафар бемор рўйхатга ва назоратга олинган. Кўриб турибмизки, қандли диабетга чалинганлар охирги 3 йилда деярли 60 мингга кўпайган. Бундан кейин скрининг текширувлари ва касалликни аниқлаш ишлари кўпайиб боради. Ўзбекистонда қандли диабет билан касалланган беморлар сони ортиши кутилмоқда», — деди Соғлиқни сақлаш вазири биринчи ўринбосари Баҳодир Юсуфалиев.
Қайд этилишича, олиб борилган тадқиқотлар ва Наманганда ўтказилган ўрганишлар натижасида мамлакатда қандли диабет билан касалланган беморлар сони (230 минг) келгусида 4—5 мартага ошиши мумкин.
«Ҳозирда шу 230 минг бемордан 66 765 нафарига давлат томонидан инсулин берилади. Беморларимизнинг инсулин билан таъминоти — муҳим масала», — деди Баҳодир Юсуфалиев.
Мулоқот мобайнида академик Ё.Х.Тўрақулов номидаги Республика ихтисослаштирилган эндокринология илмий-амалий тиббиёт маркази олимлари ва етакчи мутахассислари томонидан инсон саломатлиги ва жамият ривожига салбий таъсир этувчи бундай касалликларнинг олдини олиш ва беморларга тиббий хизмат кўрсатиш сифатини ошириш борасида тизимли ишлар амалга оширилаётгани хусусида тўхталиб ўтилди.
Изоҳ (0)