Ана шундай учрашувларнинг навбатдагиси банкнинг масъул раҳбарлари ҳамда Бухоро вилоятидаги тадбиркорлар ўртасида бўлиб ўтди. Бу каби учрашувларнинг мақсадлари қуйидагилар:
- тадбиркорлик субъектларининг ҳуқуқ ва манфаатларини ҳимоя қилиш;
- уларни қийнаб келаётган муаммоларни жойига чиққан ҳолда ўрганиш ҳамда бартараф этиш;
- давлат ва маҳаллий дастурларга киритилган барча лойиҳаларни ўз вақтида молиялаштириш.
Очиқ мулоқотлар давомида ҳеч қандай сансалорликларсиз банк хизматлари кўрсатиш, тадбиркор халқимиз дардларига малҳам бўлиш бугунги куннинг энг муҳим ва долзарб вазифаларидан бири эканлиги алоҳида таъкидланди.
Кичик бизнес вакилларига банк қонунчилиги бўйича кўплаб ҳуқуқий маълумотлар берилди. Жумладан, экспорт ва экспортолди молиялаштириш қоидалари, экспорт кредитлари ва таваккалчиликни суғурталаш механизмларини самарали ташкил этиш, Вазирлар Маҳкамаси ҳузуридаги Тадбиркорликни ривожлантиришни қўллаб-қувватлаш жамғармаси орқали кредит фоизларни компенсациялаш ва кафиллик бериш тартиблари бўйича атрофлича маълумот берилди.
Сайёр учрашувларда кичик бизнес ва тадбиркорлик субъектларидан тушган 74 та мурожаатнинг 27 тасида акс этган лойиҳалар бевосита жойида ҳал этилди. Қолган 47 та, яъни қўшимча ўрганиш талаб этиладиган мурожаатда кўтарилган масалаларни қисқа муддатларда ҳал этиш чоралари кўрилиб, ҳудудлардаги мутасадди раҳбарларга аниқ муддати белгиланган ҳолда қатъий вазифа ва топшириқлар берилди.
Жумладан, Бухоро вилояти Ромитан туманида фаолият кўрсатаётган «Зиннат Зафар Жафар» МЧЖ томонидан Хитой давлатидан бетон ва плита маҳсулотлари ишлаб чиқариш мини заводини олиб келиш учун (Тадбиркорликни ривожлантиришни қўллаб-қувватлаш жамғармасининг 3 фоизли компенсацияси билан) 200 миллион сўм кредит ажратиш масаласи ҳал этилди.
Эслатиб ўтамиз, бу каби тадбирлар Ўзбекистон Республикаси Президенти ҳузурида жорий йилнинг 2 август куни ўтказилган видеоселектор йиғилишида тижорат банкларига юклатилган топшириқлар ижросини таъминлаш доирасида ўтказилмоқда.
Реклама ҳуқуқи асосида.
Изоҳ (0)