Бухоро шаҳрида эҳтиёжманд оилалар, жисмоний имконияти чекланган фуқаролар, шунингдек, санъат, маданият соҳаси ходимлари ва фаол ёшлардан иборат 420 оилага 10 та 7 қаватли уйдан хонадонлар топширилди.
Ушбу уйлар Президентнинг 2016 йил 22 ноябрдаги «2017—2020 йилларда шаҳарларда арзон кўп квартирали уй-жойлар қуриш ва реконструкция қилиш дастурини амалга оширишга доир чора-тадбирлар тўғрисида»ги қарори асосида бунёд этилган.
«Ўзшаҳарқурилишинвест» инжиниринг компанияси Бухоро вилояти бўйича вакили Ҳаёт Низомовнинг маълум қилишича, уй-жойлар «Қурилишмегатранс», «Проммонтажстрой» сингари қурилиш-монтаж корхоналари томонидан бунёд этилган.
Уларнинг қурилишига 102,6 миллиард сўм сарфланган. Ушбу маблағнинг 12 миллиард сўмдан ортиғи хонадон соҳибларининг дастлабки тўлов бадали ва тижорат банкларининг кредит маблағи ҳисобидан молиялаштирилган.