Расман: «Арсенал» «Реал» ўйинчисини ижарага олди

«Реал» ярим ҳимоячиси Дани Себальос янги мавсумни «Арсенал» таркибида ижара асосида ўтказади. Бу ҳақда Лондон клубининг расмий сайтида эълон қилинди.

22 ёшли футболчи «тўпчилар» сафида бир йил тўп суради ва у 8-рақам остида ҳаракатланади.

«Данининг бизга қўшилганидан хурсандмиз. У иқтидорли, ажойиб техникага эга фойдали ўйинчи», — деди «канонирлар» бош мураббийи Унаи Эмери.

Эслатиб ўтамиз, «Реал» Себальосни 2017 йилда «Бетис»дан 16,5 миллион евро эвазига сотиб олганди. Ортда қолган мавсум у Ла Лигада 23 та учрашувда (13 тасида асосий таркибда) майдонга тушиб, 3 та гол уришга муваффақ бўлганди.

Унинг «Қироллик клуби» билан тузган шартномаси 2023 йилнинг ёзига қадар амал қилади.