Ҳиндистонлик аёлнинг ошқозонидан 1,5 килограммдан ортиқ заргарлик буюмлари ва тангалар чиқариб олинди

Ҳиндистонлик жарроҳлар Ғарбий Бенгалия штатида 26 ёшли бемор аёлнинг ошқозонидан 1,5 килограммдан ортиқ танга ва заргарлик буюмларини чиқариб олди. Бу ҳақда «ТАСС» хабар берди.

Қайд этилишича, аёл заргарлик буюмларини шу тарзда яширишга қарор қилган.

Руҳий касалликка чалинган аёлнинг ичидан 5 ва 10 рупий қийматдаги 90 та танга, занжирлар, бурун узуклари, сирғалар, билагузуклар ва ҳаттоки қўл соатлари топилган.

«Биз заргарлик буюмлари ғойиб бўлаётганини пайқадик. Аммо ҳар сафар ундан бу ҳақда сўраганимизда, у йиғлай бошларди» - деди ноодатий беморнинг онаси. Маълум бўлишича, ёш аёл овқатланиш вақтида ўз хазиналарини «яширган».

Жабрланувчининг оиласи бой эмас ва заргарлик буюмлари асосан мисдан бўлган, аммо бир нечта тилла буюмлар ҳам топилган.