Россияда мева ва сабзавотларни чегарадан олиб ўтиш тартибига ўзгартириш киритилди

Россияда 19 августдан бошлаб чегарадан мева, сабзавот ва гулларни олиб ўтиш бўйича янги тартиб-қоида амалга киради, деб хабар берди Sputnik.

Янги тартиб-қоидага кўра, эндиликда Россия ҳудудига кираётган ёки ундан чиқиб кетаётган фуқароларнинг қўл юкхалтасидаги мева ва сабзавотлар беш килограммдан ортиқ бўлмаслиги, шунингдек, ҳар бирида 15 тадан ортиқ бўлмаган учтагача гулдаста олиб ўтишга рухсат берилади.

Ундан ортиқ партияни олиб ўтувчилардан фитосанитария сертификатлари талаб қилинади, агар сертификат бўлмаса товарлар ортга қайтарилади ёки йўқ қилинади.

Таъкидлаш керакки, мазкур тартиб фитосанитар хавф юқори бўлган меваларга — хурмо, анжир, ананас, авакадо, гуава, манго, шунингдек, ўрик, олча, гилос, шафтолиларга тегишли.

Бундан ташқари чеклов ёнғоқ, помидор, карам, редиска, шолғом, пиёз ва қулупнайларга ҳам тегишли.