Махсус операция кучларида хизмат қилаётган наққош аскар томонидан «Мен ғолибман» портрети ва 100 га яқин ландшафтли безаклар яратилди (фото)

Марказий ҳарбий округига қарашли Жиззах вилояти Бахмал туманидаги ҳарбий қисмда наққош аскар томонидан бир қатор санъат асарлари яратилди. Бу ҳақда Марказий ҳарбий округ матбуот хизмати «Дарё»га маълум қилди.

Шартнома асосидаги ҳарбий хизматчи, оддий аскар Қобилжон Мамадалиев 1994 йилда Наманган вилояти Уйчи туманида туғилган. Болалигидан расм чизиш, наққошлик санъатига иштиёқи ўзгача бўлган ўғлон коллежни тамомлаб, 2013—2015 йиллар давомида наққошлик ва дизайнер йўналиши бўйича қўшимча таълим олган.

2016 йилда муддатли ҳарбий хизматни ўтаб, шартнома бўйича хизматга қолади. Ҳозирги вақтга қадар қўли гул аскар «Мен ғолибман», «Буюк сиймолар» ҳамда кўплаб ландшафтли безакларни ясаб, ҳарбий қисмга ўзгача кўрк қўшиб келмоқда.

«Мен ғолибман» номли портрет ва «Темур тузуклари» китоби тобора оммалашиб бормоқда. Яқинда ушбу санъат асарлари Ўзбекистондаги биринчи рақамли «Каттақўрғон» полигонига ҳам ўрнатилди.

«Мен ўз касбимдан фахрланаман, чунки болаликдаги бирдан бир орзуйим Ватан ҳимоячиси бўлиш эди. Севимли касбим ва машғулотим билан шуғулланишга имконият яратиб беришмоқда. Бундан жуда хурсандман», — дейди ҳарбий хизматчи Қобилжон Мамадалиев.

Ҳарбий қисмда ташкил этилган наққошлик тўгарагига кўплаб ҳарбий хизматчилар аъзо бўлмоқда. Ҳозирда ушбу ҳарбий қисмда буюк бобокалонимиз Амир Темур сиймоси ва «Темур тузуклари» китоби замонавий ёндашув асосида яратилмоқда.