Самарқанд шаҳрида меҳнат инспекторлари мажбурий меҳнатга жалб этилди

«Дарё» таҳририятига Самарқанд шаҳар аҳоли бандлигига кўмаклашиш маркази ходимларининг мажбурий меҳнат қилаётганлиги ҳақида мурожаат ва унга илова тариқасида расмлар тақдим этилди. Расмларда марказ ходимлари шаҳардаги Садриддин Айний кўчасидаги ободонлаштириш ишларига жалб қилинганлиги, улар пиёдалар йўлаклари учун бетон қуяётганлиги акс эттирилган.

Мурожаатда айтилишича, 8 июлдан бошлаб Самарқанд шаҳар аҳоли бандлигига кўмаклашиш маркази раҳбари қўл остида ишловчи меҳнат инспекторларини Садриддин Айний кўчасидаги йўл бўйида бетон қуйиш учун мажбурий меҳнатга жалб этган. Меҳнат инспекторларининг ишини шахсан шаҳар аҳоли бандлигига кўмаклашиш маркази директори назоратга олган. Уларни доимий тарзда ишлашини кузатиб, ходимларга қилиниши лозим бўлган ишларни топшириб турган.

– Бизлар меҳнат ҳуқуқи бузилган фуқароларнинг ҳуқуқларини ҳимоя қилишимиз керак. Аммо бугун ўзимиз мажбурий меҳнатга жалб қилинганмиз. Раҳбар ҳокимиятнинг буйруғини бажаряпмиз, дейишдан нарига ўтмайди, — дейилади мурожаатда.

Мурожаатда таъкидланишича, ҳар куни эрта тонгдан меҳнат инспекторлари белгиланган топшириқни бажариши шарт. Бетон қуйиш ишлари шаҳарнинг асосий йўл қисми ҳисобланган, транспорт кўп қатнайдиган Садриддин Айний кўчасида амалга оширилмоқда. Ҳеч қандай хавфсизлик чоралари кўрилмаган.

Маълумотларга кўра, ҳокимлик томонидан ушбу кўчада қурилиш-ободонлаштириш ишлари олиб бориш бўйича топшириқ берилган.

«Агар Сиз меҳнат ҳуқуқи бузилаётган бирор бир ҳолатга дуч келсангиз, Давлат меҳнат инспекциясининг +998 71 200-06-00 ишонч телефони ҳамда @mehnathuquqbot Telegram боти орқали мурожаат қилишингиз мумкин», дейилган Ўзбекистон Бандлик ва меҳнат муносабатлари вазирлиги сайтида. Агарда мана шу ташкилотда ишлаётган меҳнат инспекторларининг ҳуқуқлари бузилса улар кимга мурожаат қилиш керак?