Ўзбекистонда гўшт импорти ҚҚСдан озод этилди

Ўзбекистонда гўшт импорти 2019 йилнинг октябрь ойигача қўшилган қиймат солиғидан озод этилди. Бу ҳақда Адлия вазирлигининг «Ҳуқуқий ахборот» Telegram-канали хабар берди.

Қайд этилишича, ҳукумат қарори (591-сон, 16.07.2019 й.) билан Ўзбекистонда ишлаб чиқариладиган реализация қилиш оборотлари қўшилган қиймат солиғидан озод этиладиган озиқ-овқат маҳсулотлари рўйхатига ўзгартириш ва қўшимчалар киритилди.

Киритилган ўзгартиришларга мувофиқ, 2019 йил 1 октябргача бўлган муддатда импорт қилинган гўшт (мол, қўй, товуқ), шунингдек тирик ҳайвонлар (қорамол ва парранда) ҳамда уларнинг сўйилган маҳсулотлари ҳам қўшилган қиймат солиғидан озод қилинди.