Ўзбекистонда XI—XII асрлардаги Марказий Осиё халқлари тарихи ҳақида сериал тасвирга олинади

2019 йилнинг октябрь ойида Ўзбекистон ҳудудида Жейкоб Шварц жамоаси (8К форматидаги илк фильмни олган жамоа) томонидан XI-XII асрлардаги Марказий Осиё халқлари тарихи ҳақидаги сериалнинг илк эпизоди тасвирга олинади. Эпизод тасвирга олинувчи жойлар бўйича келишувга эришилган. Бу ҳақда Туризмни ривожлантириш давлат қўмитаси хабар бермоқда.

Фильм учун актёрлар таркиби хориждан жалб этилади, зеро бу биринчи пилот лойиҳа бўлгани учун тўлиқ инглиз тилида ишланади, кейинги сериалларга ўзбек актёрлари ҳам жалб этилади. Сериалнинг тарихга мувофиқ келишига Ўзбекистон Республикаси Туризмни ривожлантириш давлат қўмитаси раиси маслаҳатчиси  Беҳруз Ҳамзаев масъул, Шварс жамоаси эса продакшн ва пост-продакшн ишлари учун жавоб беради. Бу фильм Netflix ёки Amazon орқали тарғиб қилинади.

Ушбу сериал лойиҳасини йўлга қўйишга нима туртки берди? Шу кунгача «Тахтлар ўйини» сериали жуда кўп одамлар томонидан севиб томоша қилинди. Ундаги кўплаб элементлар айнан Марказий Осиё халқлари тарихидан келиб чиққан. Шундан келиб чиққан ҳолда, Ўзбекистон ҳудудида тарихий сериални суратга олишга аҳд қилинди.

«5-10 йил олдин Ҳолливудда юнон мифологиясига оид фильмлар урф бўлган эди. Кейинчалик бу Миср ва Скандинавия мифологиялари билан алмашди. Бугунга келиб эса парадигма Марказий Осиё халқлари ва Шарқ афсоналарига яқинлашмоқда. Ушбу сериални Ҳолливуд катта экранларига олиб чиқишга ҳаракат қиламиз, зеро айни дамда кинематография энг ривожланган давлат АҚШ ҳисобланади», — дейди Ҳамзаев.

Туризмни ривожлантириш давлат қўмитаси ушбу лойиҳанинг тўлақонли ҳамкори сифатида иштирок этмоқда. Бундан мақсад кинематография туризм тарғиботида муҳим роллардан бирини ўйнайди. «Мисол учун, «Тахтлар ўйини»да воқеалар ривожи асосан Дубровник шаҳрида тасвирга олинган ва бугунга келиб у тўртинчи йил кетма-кет Европанинг энг зўр сайёҳлик маскани ҳисобланади. «Худди шу тариқа биз ҳам шаҳарларимиз тарғиботини йўлга қўямиз. Сериални кўргандан кейин одамларда бу воқеалар қаерда олинган эканлигига оид саволлар ва қизиқиш пайдо бўлади. Бу туристлар билан бирга бошқа киноижодкорларни ҳам Ўзбекистонга жалб қилиб, туризмнинг бундай турини ривожлантиришга замин яратади», — дея изоҳлайди Қўмита раиси маслаҳатчиси.

Маълум бўлишича, тарихий сериал саундтреки таниқли ўзбек бастакори ва кўплаб хитлар муаллифи Шаҳноз томонидан басталанмоқда.