Нукусда Ўзбекистон театрларининг республика кўрик-фестивали ғолиблари тақдирланди

Бердақ номидаги Қорақалпоқ давлат академик мусиқали театрида Ўзбекистон театрларининг республика кўрик-фестивали ғолибларни тақдирлаш маросими бўлди.

Беш кун давом этган тадбир Оролбўйида ҳақиқий маданият байрамига айланди. Фестиваль доирасида Мўйноқ, Қонликўл, Тахтакўпир, Шуманай, Чимбой, Амударё, Элликқаъла туманларида республика театрларининг спектакллари ва ижодий учрашувлари ташкил этилди. Савицкий номидаги давлат санъат музейида драматургларнинг семинари, Ёшлар марказида Ўзбекистон давлат санъат ва маданият институти Нукус филиали талаба ёшлари билан учрашув ўтказилди.

Кўрик-фестиваль якунида биринчи ўрин Бердақ номидаги Қорақалпоқ давлат академик мусиқали театрининг «Саховат боғи» спектаклига берилди. Иккинчи ўринни Ўзбекистон давлат драма театрининг «Ер барибир айланаверади» спектакли, учинчи ўринни Ўзбекистон давлат академик рус драма театрининг «Танҳо қайиқ» ва Сирдарё вилояти мусиқали драма театрининг «Инсонликка номзод» спектакллари эгаллади.

Шунингдек, қатор номинациялар бўйича ғолиблар аниқланди.