Гулнора Каримовага руҳий босим ўтказилаётгани ҳақида хабарлар тарқалди. Бош прокуратура буни рад этмоқда

Гулнора Каримованинг швейцариялик адвокати Грегуар Манжа май ойи охирида Twitter’даги саҳифасида Гулнора Каримовага шифокорлар бўйича рад жавоби берилаётгани ва унга доимий руҳий босим ўтказилаётгани ҳақида ёзган эди.

Грегуар Манжа мижозининг саломатлигидан жиддий ташвишда эканлигини билдирган. Адвокатнинг сўзларига кўра, унинг сўнгги ташрифидан сўнг Гулнора Каримова «дарҳол қамоқхона тиббий блокидан чиқариб юборилган».

Бош прокуратура матбуот хизматидан «Дарё»га маълум қилишларича, адвокатнинг сўзлари ҳақиқатга тўғри келмайди.

«Бу асоссиз гап. Шу кунларда ‘Гулнора Каримова ўзини осибди’ деган бошқа гаплар ҳам тарқалди. Шуни қатъий айтишимиз мумкинки, Гулнора Каримованинг соғлиғи қониқарли, у белгиланган жазони ўтамоқда», — дейилади Бош прокуратура томонидан «Дарё»га тақдим этилган ахборотда.