Калифорниялик оила Tesla компаниясига қарши судга даъво аризасини берди. Унда кўрсатилишича, оиланинг икки ёшли фарзанди Model X ичига кириб олиб, ўз онасини гараж деворига тираб қўйган, деб хабар беради Forum Daily.
Мазкур ҳодиса 2018 йилнинг 27 декабрида содир бўлган.
Даъвога кўра, нохуш ҳодиса вақтида Мэллори Харкортнинг саккиз ойлик ҳомиласи бўлган. Авария оқибатида унинг бир нечта суяги синган ва фарзанди муддатидан олдин туғилган.
Мэллори ўз автомобилини 23 декабрда харид қилган. Унинг таъкидлашича, аёл машинани гаражи олдидаги тураргоҳда орқа эшиги очиқ ҳолда қолдирган. Болакай эшик орқали машинага кириб, олд ўриндиққа ўтириб олган. Аёл машина олдидан ўтаётганида машина орқа эшиги очиқ ҳолда олдинга ҳаракатланиб, уни деворга қисиб қўйган. Қўшнилар ёрдамга етиб келгунига қадар аёл шу аҳволда турган.
Model X’да ишга тушириш тугмаси йўқ, автомобиль электрон брелок белгиланган жойга яқинлашганида ҳаракатга келади.
Даъво аризасида таъкидлашича, Model X’га бу каби кўнгилсиз ҳодисаларнинг олдини олиш учун қўшимча блокировга ҳимояси ўрнатилиши керак, педалларни босганда эшикни автоматик равишда ёпадиган функция эса «мантиқсиз ва кўплаб хавфли вазиятларни юзага келтиради».
Tesla даъвога изоҳ бермаган, бироқ уларнинг таъкидлашича, тергов вақтида ҳеч қандай техник носозлик аниқланмаган.
Изоҳ (0)