Аввал хабар қилинганидек, Самарқанд вилоятида фуқаро А.Х. ва унинг оила аъзолари (жами 5 нафар) жасадлари қотиллик аломатлари билан топилганлиги ҳолати юзасидан Бош прокуратуранинг Ўта оғир жиноятларни тергов қилиш бошқармаси томонидан жиноят иши бўйича дастлабки тергов ҳаракатлари олиб борилмоқда.
Бош прокуратура матбуот хизматига кўра, тергов-тезкор гуруҳи амалга оширган кенг қамровли тадбирлар натижасида жиноят фош этилди. Ушбу маҳаллада яшовчи Ғ.Т. (1981 йилда туғилган, ишсиз), Ж.У. (1993 йил, ишсиз), Ш.Э. (1995 йил, ишсиз) ва Х.Н. (1996 йил, ишсиз) ноқонуний бойлик орттириш мақсадида жорий йил 15 майга ўтар кечаси марҳум А.Х.нинг хонадонига яширинча кириб, уларнинг ухлаб ётганлигидан фойдаланиб, ўзлари билан олиб келган темир бўлаклари билан бош, юз ва жағ қисмларига бир неча маротаба уриб, қасддан ўлдириб, хонадондан 22 миллион сўм ва марҳум Ж.И.нинг Samsung Galaxy А8 русумли телефонини қўлга киритган.
Шундан сўнг жиноят изларини яшириш мақсадида марҳум Ж.И.га тегишли Damas русумли машинага жасадларни юклаб, автомобилни Қўшработ тумани, «Дўстлик» МФЙ., «Боқичиғатой» қишлоғидаги далага ташлаб кетишган.
Гумон қилинувчилар Ғ.Т., Ж.У., Ш.Э. ҳамда Х.Н.нинг содир этган жиноятлари уларнинг иқрорлик кўрсатувлари, гумон қилинувчиларнинг кўрсатувларини ҳодиса жойида текшириш тергов ҳаракатлари, ашёвий далил тариқасида олинган жиноят қуроллари бўлган 4 дона темир бўлаклари, марҳум Ж.И.га тегишли бўлган Samsung Galaxy А8 русумли телефон аппарати, марҳумларга тегишли бўлган пул маблағлари, жиноят содир этиш вақтида гумон қилинувчиларнинг эгнида бўлган кийимлари ва бошқа далиллар мажмуи билан тўлиқ тасдиқланмоқда.
19 май куни Ғ.Т., Ж.У., Ш.Э. ва Х.Н.лар Жиноят кодексининг 97-моддаси 2-қисми «а», «в», «ж», «и» ,«п» бандлари билан гумон қилинувчи тариқасида ишда иштирок этишга жалб қилиниб, Жиноят-процессуал кодексининг 221-моддаси тартибида ушланган.
Дастлабки тергов ҳаракатлари давом этмоқда.
Изоҳ (0)