Google компанияси фойдаланувчилар орасида сўровнома ўтказиб, Eurovision халқаро мусиқий танловининг финалчилари рейтингини тузиб чиқди, деб хабар беради «РИА Новости».
«Биз ҳозирнинг ўзида Google қидирув тизими фойдаланувчиларининг фикри бўйича ким ғолиб бўлишини билиб олишимиз мумкин», — дейилади компания матбуот хизматининг хабарида.
Интернет фойдаланувчилари орасида Франция вакили Билал Ассани кўпроқ овоз тўплаган бўлса, иккинчи ўрин — Исландиядан келган Ҳатари гуруҳига насиб этди. Кучли учликка Россиядан борган Сергей Лазарев якун ясаган.
Шунингдек, фойдаланувчилар Нидерландия, Беларусь, Кипр, Швейцария, Италия, Сан-Марино ва Швеция вакилларига ҳам катта қизиқиш билдирган.
2017 йили Google башорат қилган иштирокчи танлов ғолибига айланган эди. 2018 йилда ҳам интернет-аудиторияси томонидан танланган иштирокчи биринчи ўринни эгаллаган.
Eurovision танловининг финал босқичи 18 май куни Исроилнинг Тел-Авив шаҳрида бўлиб ўтади.
Изоҳ (0)