14 майнинг эътиборга молик янгиликлари — «Дарё» дайжестида.

Самарқанддаги истироҳат боғларидан бирида аттракционда учаётган қиз отилиб чиқиб кетди.

Истироҳат боғи раҳбарияти аттракционда учаётган қиз муддатидан олдин хавфсизлик камарини ечиб юборгани учун йиқилиб тушганини маълум қилди. Шунингдек, қиз дарҳол барча тиббий кўрикдан ўтказилгани ва ҳеч қандай жароҳат олмагани айтилди.

Бош прокуратура маълумотига кўра, қизга «бошнинг энса чап соҳаси юмшоқ тўқималари лати» ташхиси қўйилиб, биринчи тиббий ёрдам кўрсатилиб, уйига жавоб берилган.

***

АҚШ президенти Дональд Трамп 13 май куни Оқ уйда ифторлик ўтказди.

Тадбир давомида АҚШ президенти Дональд Трамп нутқ сўзлаб, ислом оламини муқаддас Рамазон ойи билан табриклади.

***

Ой вақт ўтиши билан кичрайиб бормоқда, бу эса ой зилзиласига сабаб бўлиши мумкин.

Ер йўлдоши унинг ички қисми совиб бораётгани билан баравар равишда кичраймоқда. Сўнгги бир неча миллион йил мобайнида Ой 50 метрга кичрайди.

***

Ўзбекистон халқ артисти Яйра Абдуллаева 89 ёшида вафот этди.

Яйра Абдуллаева 1930 йили Тошкентда туғилган. 1950 йилдан ҳозирги Ўзбек Миллий академик драма театрида иш бошлаган. 1964 йили Ўзбекистон халқ артисти унвони билан тақдирланган. 1998 йили «Дўстлик» ордени билан мукофотланган.

***

Ўзбекистонда 2020 йилдан бошлаб янги шартларда ипотека кредитлари ажратилади.

2020 йил 1 январдан бошлаб, мақсадли дастурлар ижроси доирасида янги шартларда ипотека кредитлари ажратилади. Бу Президентнинг «Ипотека кредити бозорини ривожлантириш ва кенгайтиришга оид қўшимча чора-тадбирлар тўғрисида»ги фармонида кўзда тутилган.