Фарғона вилоятидаги «Қўқон» эркин иқтисодий зонасида Hyundai электромобилларини ишлаб чиқариш бўйича корхона ишга туширилиши мумкин. Ўзбекистон Президенти Шавкат Мирзиёев 6 май куни лойиҳа тақдимоти билан танишди.
«Ўзбекистон 24» телеканали ахборотига кўра, Жанубий Кореянинг Hyundai Motor ва Evergreen Motors компаниялари ҳамда Ўзбекистон Инвестициялар ва ташқи савдо вазирлиги ва Фарғона вилояти ҳокимлиги ҳамкорлигида амалга оширилиши кутилаётган лойиҳа 2021 йилда завод қурилишини бошлаш, 2023 йилдан эса Ўзбекистонда сериялаб электромобиллар ишлаб чиқаришни йўлга қўйишни назарда тутади.
Умумий қиймати 300 миллион долларга баҳоланган лойиҳа доирасида нафақат электромобиллар ишлаб чиқарилади, балки улар учун зарур инфратузилма (масалан, электромобилларни қувватлантириш тармоқлари) ҳам ташкил этилади. Камида 1000 киши ишлайдиган бўлажак автозавод йилига электрда ҳаракатланувчи 10 мингта автомобиль ишлаб чиқариши кутилмоқда.
«Ўзбекистон 24» телеканалида намойиш этилган лавҳаларда Hyundai Ioniq хэтчбеки ва Hyundai Kona кроссоверлари кўрсатилди. Уларнинг ҳар иккиси ҳам электромоторда ҳаракатланади — 2016 йилдан бери ишлаб чиқарилаётган Ioniq бир марта тўлиқ қувватлантирилганидан сўнг 280 километргача йўл босиши мумкин, электрда юрадиган версияси 2018 йилдан бери йиғилаётган Hyundai Kona эса битта тўлиқ қувватда 470 километргача йўл боса олади.
Маълумот учун, Жанубий Кореянинг Hyundai Motor ва Evergreen Motors компаниялари билан ҳамкорликда Фарғона водийсининг бошқа вилояти — Наманганда тижорат автомобиллари ва автобуслар ишлаб чиқарувчи автозавод қуриш лойиҳаси амалга оширилмоқда.
Изоҳ (0)